Seizcin bineix caeuq bingzciengz gig mbouj doxdoengz, ngoenzseng gyabuz gou hix lumj vunz naengh ci gvaq bya nei, hawj vunz yaep lau yaep angq.

Liggaeuq ndwenngeih ngeihcib ngeih dwg ngoenzseng gyabuz, bineix doiq ligmoq 3 nyied 15 hauh, de ndaej 80 hopbi. Bi’gvaq youq ngoenzciet bet nyied cibngux, daengx ranz vunz couh doxyaeng ndei, bineix yaek nauhyied banh ndei ngoenzseng gyabuz, gou hix swnh bineix ngoenz yenzdan aen- diemq dangauh guh hozdung, hawj ngaenz dingh guh song aen dangauh. Hoeng daengz ngoenzseng gyabuz gaxgonq, daengx ranz vunz fanjdauq mbouj rox ngoenzseng de baenzlawz guh.

Gyabuz gaxgonq youq lajmbanj gwn haemz gwn hoj, ciengx hung 4 boux lwg, lij daiq hung baenz gyoengq lwglan. Seizneix yienznaeuz bi’ndwen geq le, hoeng lij maij guh neix guh haenx, swiq byaek cawj haeux saeg buhvaq, lij dawz gan ranz dajleix ndaej cingjcaez seuqcingh. Ciuq fungsug ranghdieg raeuz, gyoengq lwglan daj de ndaej 60 hopbi hwnj, cungj aeu bang de gvaq ngoenzseng.

Bouxgvan gou gag roxnyinh dwg ngoenzseng 80 hopbi daxmeh de, wngdang ciuq gaxgonq yaeng ndei haenx banh ndaej nauhyied di. Hoeng, gou nyinhnaeuz bineix mbouj doxdoengz, baihgwnz lai baez iugouz mbouj ndaej comz gwn comz youq, raeuz wngdang dingqgangj, mbouj ndaej vunzlai doxcomz daeuj gvaq ngoenzseng.

“Seizneix daengx guek binghraq sinhgvanh feiyenz gaenq yied ngoenz yied noix, Guengjsae raeuz hix mbouj caiq miz gij vunz bonjdieg fatbingh, ranghdieg Vujmingz raeuz engqgya mbouj miz saek boux deng cungj bingh neix gvaq, lau maz ne!” Bouxgvan sing gaenj gangj dwk, caengz caj gou haibak, de youh naeuz:“Gou ceiq lauheiq bineix dwg daxmeh gvaq ngoenzseng mbat gatsat ha……”

W, gou rox bouxgvan yousim maz lo, gienh saeh neix caen hoj guh ha! Gyabuz song ngoenz gaxgonq ngamq daj yihyen okma, hoeng mbouj dwg naeuz de gaenq yw ndaej ndei lo, couhdwg de roxnyinh ndangdaej haemq ndei, mbouj nyienh caiq youq ndaw yihyen lo, euq aeu maranz youq, hoeng lij miz yiengh genjcaz ceiq youqgaenj ndeu gvaq geij ngoenz cij rox gezgoj ne. Aen gezgoj genjcaz yaek hawj canghyw rox gij bingh gyabuz dwg mbaeu roxnaeuz naek, doeklaeng baenzlawz yw, hoeng gangj le geijlai baez, gyabuz mbouj haeuj rwz, gyagoeng hix doengzeiq gyabuz dauqranz. Euq mbouj gvaq bouxgeq, 3 nyied 12 hauh cijndaej daiq de maranz lo.

Daj dingq canghyw naeuz gyabuz aiq deng bingh naek seiz, bouxgvan couh gag ienq swhgeij, ienq mbouj caeuxdi daiq gyabuz bae yihyen cazyawj ndangdaej. Bouxgvan 3 nyied codaeuz ma ranzmbanj cunz bohmeh, roxnyinh gyabuz beij gaxgonq byom- roz, saeknaj mbouj ndei geijlai. Gyabuz naeuz dwgliengz geij ngoenz, gwn haeuxngaiz mbouj miz feih geijlai, gaenq bae yihyen aeu yw ma gwn lo. Bouxgvan dingq le nyinhnaeuz mbouj miz maz youqgaenj, couh mbouj haeujsim geijlai.

Hoeng, mbouj daengz aen singgeiz ndeu caiq ma ranzmbanj, bouxboux yawjraen gyabuz cungj roxnyinh de saeknaj heuseuseu caemhcaiq hawqvatvat, beij ngoenz- naengz rwix lai lo, bouxgvan vaiqdi soengq de daengz yihyen ndaw singz cazyawj. Baez genjcaz, canghyw couh naeuz cingzgvang gyabuz aiq mbouj daiq ndei, ceiqndei haeuj yihyen youq roengzdaeuj, guh genjcaz cienzmienh di caiq hawj yw. Baez dingq canghyw baenzneix gangj, bouxgvan sim diuq fubfub, doq hawj gyabuz haeuj yihyen youq roengzdaeuj. Hoeng, gyabuz haeuj yihyen youq geij ngoenz, guh geij cungj genjcaz le, canghyw lij caengz ndaej duenhdingh dwg maz bingh, doeklaeng lij aeu guh cungj genjcaz ndeu dem, naeuz yienghhaenx cij caz ndaej cingcuj. Seizneix gij bingh gyahbuz dwg mbaeu dwg naek lij caengz rox, daengx ranz vunz vih neix geijlai youheiq ha!

(caengz sat)