Gou caen siengj bae daengz gwnz dingjbya ceiq gyae ceiq gyae de bae!

Haetromh, gizde miz haujlai fwjgyaepbya, gou iet fwngz cix mbaet ndaej. Gou yaek mbaet haujlai fwjgyaepbya dauqdaeuj, venj youq gwnz bya gizneix, yienghneix ndoibya baihneix couh lai gyaeundei lo.

Gyanghaemh, gizde miz haujlai ndaundeiq, gou iet fwngz couh mbaet ndaej. Gou yaek mbaet haujlai ndaundeiq dauqdaeuj, venj youq gofaex gizneix, yienghneix ndoengfaex gizneix cix lai gyaeundei lo.

Beixmbauq riu gou huk, naeuz gyangmbwn gizde sangngaungau.

Guhlawz sangngaungau bae ne? Mwngz yawj ha, miz mbangj ndaundeiq gizde, liz gwnz dingjbya lij sang mbouj gvaq gou bw! Miz mbangj ndaundeiq sang de, gou ndwn youq gwnz daengqeij goj mbaet ndaej lo.

Gou caen siengj bae daengz gwnz dingjbya ceiq gyae ceiq gyae de bae!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh(Luz Fwncangj)/卢奋长 hoiz）