Youq ndawbiengz raeuz, haujlai vunz cungj miz gij cingsaenz hawj vunzraeuz gingqboiq haenx： Gangj vah suenq vah、gyaez caemhyiemj、 maij bang vunz……Daxmeh gou hix dwg boux hawj gou gingqboiq dangqmaz ndeu, neix aenvih de dabsaed gaenxgyaek guhhong.

Daxmeh dwg guh gij hong doenghgij yenjgen gai okbae le, gvaqlaeng bauj coih ndei, langh nyaengq couh mbouj hwnz mbouj ngoenz. Doenghgij yihyen hunghung iqiq ciengzciengz dwk dienhvah daeuj heuh daxmeh bang gaijgez gij yenj- gen ok vwndiz de, ngoenzciet ngoenz- cuengqgyaj hix baenzneix.

Neix gangj bi’gvaq haemh- ndaep gwn caeuzndaep le, gou caeuq daxgoeng、daxbuz、 daxboh senq naengh youq baihnaj densi, caj cunhvanj cezmuz daengz. seizde, daxmeh ciep aen dienhvah ndeu, liuxcix naeuz bae cawqleix di vwndiz, guh sat le caiq ma caeuq dou doengzcaez yawj densi. Cezmuz hainduj yienj lo, ndeiyawj dangqmaz, gou mbouj siengj ning ndang, couh gek geij aen rug heuh daxmeh geij mbat, danhseih mbouj raen han saek sing, dou geij boux cungj laihnaeuz de ninzndaek lo.

Danhseih, gou yawj densi liux le, lwgda mumjgyumq byaij haeuj ndaw rug bae, seizhaenx gou doeksaetyat, gou ndaejnyi sing roq yiengj “dad dad dad”, gou baez yawj, yo! Daxmeh vanzlij dwk dennauj nyaengq guhhong ne! Mwngz yawj, de song da cimyawj bingzmu, da cungj mbouj yaep, song fwngz dwk genbanz riengjrit, lumj- baenz aen gihgi guhhong yauliz sang dangqmaz nei. Yawj yaep ndeu, gou gag raen daraiz gyaeujngunh, danhseih daxmeh lumjnaeuz mbouj rox baeg nei, cungj mbouj dingz saek yaep, soh dwk genbanz, diemj sujbyauh. Gou youq henz ndang de, de hix mbouj yawj gou saek mbat. De caem haeuj ndaw hong bae laeg lai lo! Dangseiz, gou boux vunz guhhong mbouj ciensim neix ndawsim fug daxmeh dangqmaz. Gou gag ngeix: Ngoenzneix dwg ngoenzndaep, bonjlaiz dwg ngoenz youq soeng gvaq angq, danhseih daxmeh vanzlij itsim haenqrengz guhhong, youq ndaw mbanj, wnggai mbouj miz bouxlawz lumj daxmeh baenzneix nyinhcaen guhhong luba! Cungj cingsaenz gingqnieb neix caen dwg cungj doenghyiengh dijbauj he ha.

Ngoenz daihngeih gou cam daxmeh, yienghneix gyaban gyadiemj guhhong naet mbouj? Daxmeh riu naeuz：“Haengjdingh naet ha! Danh- seih gou langh mbouj gibseiz cawqleix gij vwndiz haenx, miz di hidungj ndaw yihyen couh mbouj ndaej cingqciengz guhhong, yienghneix canghyw hai mbouj ndaej dan yw, bouxfatyw couh mbouj rox baenzlawz fat yw, boux- bingh couh mbouj ndaej aeu yw. Langh baenzneix couh deng luenh caez bw! Ndigah, lai dwgrengz di hix guh ndaej dij bw!” Gangj le, de najriu hozhai.

Neix couhdwg daxmeh gou hawj gou gingqboiq haenx, de ciengxlwenx cungj mbouj lau dwgrengz, nyinhcaen guhhong gag ndaej sim’angq.

（Sih Swngcwz/施圣哲）