Moulaux hai aen diemq gai gaiqcatheuj ndeu, bakdou nem miz mbaw gvangjgau ndeu:

Gaiqcatheuj bwnmou, cizlieng daih’it, baez cat couh hau.

Yawj, duzciengh daeuj lo, moulaux gwed gaiqcatheuj ceiq raez daeuj hawj duzciengh.

“Docih!”Duzciengh hab’eiq dwk bae lo.

Meuziq hix daeuj cawx gaiqcatheuj hung, moulaux naeuz: “Bak mwngz iq, cawx gaiq catheuj iq cij ngamj mwngz ne!”

Meuziq ma ranz couh cat heuj, cat ya cat, heuj ok lwed lo, hwk ndaej de muengz bae ra moulaux: “Bohlungz mou, gaiqcatheuj mwngz mbouj ndei.”

Moulaux naeuz: “Dwg gij fuengfap cat heuj mwngz mbouj deng.”

A, laxlawz dwg yienghneix: Heuj baihgwnz daj baihgwnz cat coh baihlaj; heuj baihlaj daj baihlaj cat coh baihgwnz, ndawndaw rogrog cungj aeu cat.

Meuziq yawj duzmou son cat heuj baez youh baez: “Gou rox lo.” De ma daengz ranz, cat ya cat, hi, baenzlawz cat mbouj ok bophau ya? De youh buet bae ra moulaux: “Gaiqcatheuj mwngz mbouj ndei, cat mbouj ok bop ne!”

Moulaux baez dingq, riuriu: “Mwngz mbouj yungh yazgauh.”

“Deng, gou lumz lo!” Meuziq mbouj- eiqseiq dwk iet linx, cawx ci yazgauh ndeu.

Meuziq yungh yazgauh daeuj cat heuj, hoeng daengx bak niunangnang, lijdwg mboujmiz bop.

“Haha, lwghuk!” Duzciengh yungh ndaeng de byoq di raemx coh ndaw bak meuziq. A, miz bop lo. Bop yied daeuj yied lai, meuziq yied cat yied angq.

Daj baezhaenx hwnj, seiz gaeqboux haen’oo, meuziq couh hwnqcongz cat heuj.

Hoeng, gvaq geij ngoenz, meuziq sawqmwh heuj in lo, naj hix gawh lo. De hujdengdeng bae ra moulaux: “Gaiqcatheuj mwngz di cungj mbouj ndei.”

Moulaux baez yawj, heuj meuziq baenz heujnengz lo. Vihmaz baenzneix ne? Moulaux gaeugaeu gyaeuj: “Gou rox lo, mwngz ngoenznaengz gaemh duznou ba?”

“Dwg ya!” Meuziq ngaekngaek gyaeuj.

“Mwngz gwn duznou le, cat heuj lwi?” Moulaux cam.

“Mbouj!”

“Ei, ninz gaxgonq gwn doxgaiq itdingh aeu cat heuj, mboujnex, heuj couh baenz nengz lo.”

“Laxlawz dwg yienghneix.” Heujnengz meuziq bouj ndei le, moix ngoenz gyanghwnz gwn duznou le, cungj dwg cat heuj le cij ninz, doeklaeng heuj cungj gig ndei.

（Mungz Ningz/蒙宁 daj gojgaeq lwg- nyez fanhoiz)