Gou nyeux gvaq baihlaj daizcaeq mohrin, duzngwz hung caen mbouj raen lo, cij lw gaet rieng youh lwenq youh dinj youq henz rinbanj daizcaeq, caen dwg geizheih, de mbouj bienqbaenz maz duzfangz iugvaiq ya, lauheiq youq gyangngoenz ndit dak lajde, de lij miz di lau? Baenzlawz gaet rieng haenx hix yied bienq yied dinj ne? Ca mbouj geijlai dinj lumj lwggwz yienghhaenx dinj ndwi lo, caemhcaiq lij cingq bienq iq、bienq dinj、bienq iq、bienq dinj.

“Ah Byauh.”

Henz rwz mumjgyumq ndaejnyi miz vunz heuh gou, hoeng gou mbouj ndaejhoengq bae nyi, sing haenx miz di lumj caemxndang youq laj raemx seiz dingq vunz youq gwnz henz dah heuh yienghde. Gou dan goq ndaej rieng duzngwz laj daizcaeq haenx, baez yaep da rieng de couh mbouj raen lo, rinbanj baihnaj daizcaeq hoengqvatvat, lw miz geij deiq namh soiq caeuq gij rum roz, nanzdauh duz- ngwz hung bienqbaenz geu ien ndeu, hwnj mbwn bae lo.

“Ah Byauh!”

Miz vunz youq gizgyae heuh gou, gij sing beij haxbaenh lij cingcuj di lo, lumj mbouj dwg Ah Gunh gyoengqde, gou mbouj miz rengz bae faenbied lo, hix mbouj gamj haibak han, lwgda cim youq daizcaeq baihnaj mohrin, yawj duzngwz hung haenx rox mbouj rox yaek dauqcungz ret okdaeuj yienj ndang gaeuq roxnaeuz bienqbaenz maz iugvaiq daeuj, baenzbaenz song ga gou gaenq nanqunq ndaej iet hix mbouj soh gungj hix mbouj ndaej lo, buet hix buet mbouj ndaej gyae, cij ndaej yienghneix lo.

Sawqmwh, da gou byaengq ndaej engq hung lo, lumj aeu lwgda yaek camx gvaq rinbanj daizcaeq. Gvaiq mbouj ndaej duzngwz hung mbouj raen lo, yenzlaiz laj daizcaeq giz maj nywj miz diz geh he, duzngwz hung gig mbouj yungzheih caenx haeuj ndaw geh, ndonj haeuj ndaw rinbanj bae lo. Fatyienh gijneix, ndawsim gou couh onjdupdup roengzdaeuj lo, doq mbeihung hwnjdaeuj, duzngwz hung mboujcaengz bienqbaenz iugvaiq, caemhcaiq seizneix youh ndonj haeuj rinbanj, gou lij lau maz dem ne!?

“Ah Byauh!”

(caengz sat)