Ngeih sam nyied vavengj,

Seiqlengq rongh baenz ngaenz;

Sam nyied sam daeuj daengz,

Faengz eu fwen angqcoux.

Daegbied dwg bineix,

Gwnz vangj bae eu fwen;

Gyoengq canghfwen beixnuengx,

Eu fwen youq gwnz fwj.

Youq gwnz fwj eu fwen,

Daengx lajmbwn rwenz doh;

Miz fwen youh miz go,

Youq Niujyoz ndaejnyi.

Sam nyied sam bineix,

Caeuq baezgonq mbouj doengz;

Aj bak eu geij coenz,

Doq simsoeng youq vangj.

Gou gaenq 85 bi,

Lij eu ngon Fwencuengh;

Daengq hauxseng beixnuengx,

Cungj lai ndiep eu fwen.

Youq Niujyoz eu fwen,

Rwenz ma doh ranzmbanj;

Bineix sam nyied sam,

Simhai langh baenz va.