Vunz raeuz dawz ien gingq vunz dwg roxsoq, dawz ien gingq beix- nuengx dwg doxhuz. Mwngz hawj ien vunz cit, vunz couh haenh mwngz miz laex. Cit ien miz ik miz haih, gij vunz lauxgeq cungj gangj cit ien daezsaenz, cit ien ndaej gaijmbwq, hoeng canghyw cungj naeuz cit ien miz haih lai, haih ndang swhgeij couh suenq lo, boux deng nyouq ien mwngz cit caemh deng haih bae.

Gou daj 20 sigij 60 nienzdaih couh gaen gij vunzhung hag cit ien, cigdaengz ndaej doxaeu baenzgya. Bi 1963 nienz gou hainduj cit ien, seizhaenx cit gij ien dwg iensei. Iensei dwg aeu ienmbaw yungh fagcab cad baenz. Aeu ceij daeuj gienj iensei baenz yenhcaij couh ndaej cit lo.

Gou couhdwg yienghneix hag cit ien, cit bae cit dauq couh yinx hwnjdaeuj lo. Gou ciengzseiz bak gamz miz ien, guhhong yietnaiq cit ien, gwn haeux gvaq ngamq cuengq vanj roengzdaeuj youh cit ien, lwgfwngz gou cungj bienq henj caez. Mehyah saeg buh raen buh gou haeu ien lai, couh ndaq naeuz:“Cit ien lai le, ndangdaej cungj haeu ien caez, buhvaq caemh haeu caez lo.” Yienznaeuz deng mehyah ndaq lai baez, hoeng, gou cungj gaiq mbouj bae ien.

Doeklaeng gou cit ien, cungj cawx gij ien moix bau gai 8 faen daengz gak ngeih ngaenz. Gou 1963 nienz doxaeu baenzgya, daengz 1965 nienz miz lwgnyez. Ranz gou gungh miz song dahsau, gou caeuq mehyah guhhong ciengx ranz, ngaenz mbouj gaeuq yungh, lwgnyez hung le soengq bae doegsaw cungj yungh ngaenz, saedceij yienghneix dwgrengz, gou lij aeu ngaenz bae cawx ien cit, gvaiq mbouj ndaej deng mehyah ienq lo.

Cit daengz bi 2010, gou baenz- bingh lo, baez cit ien couh ae. Gou bae yihyen genjcaz le, canghyw gangj mbouj ndaej cit ien lo, hoeng, gou lij laeglemx ok ranzvunzbingh bae cit ien. Canghyw、husw raen le cungj gangj:“Mwngz caiq cit ien couh mbouj miz mingh lo.” Vunz ndawranz hix cungj gienq gou doeklaeng mbouj ndaej cit ien lo.

Ndawsim gou hix rox, seizneix gaenq bienq laux lo, youh miz bingh, youh deng ae, caemhcaiq bak haeu ndang haeu, yienghneix roengzbae mbouj gaiq ien mbouj ndaej. Baenzneix gou couh gietsim gaiq ien lo.

Hoeng, gaiq gvaq sam baez, cungj gaiq mbouj bae. Daengz bi 2010, caiq gaiq ien, dauqdaej gaiq ndaej bae lo. Gou daj hainduj cit ien daengz seiz gaiq ndaej ien, miz 40 lai bi, cit ien baenzlai bi lij gaiq ndaej ien, caen mbouj yungzheih. Gou vihmaz gaiq ndaej ien, ceiq youqgaenj dwg aeu miz gietsim, vunz gingq ien mbouj ciep, vunz hawj ien mbouj cit. Bak yaek ngeix cit ien seiz couh bae gwn mak gwn dangz.

Gou gaiq ndaej ien le, ndangdaej ndei lo, bingh gag ndei lo. Gou aeu gyo’mbaiq gyoengq canghyw caeuq husw, dwg gyoengqde gienq gou gaej cit ien aeu hoh ndangdaej, hix gyo’mbaiq vunzcaen itcig cihciz gou gaiq ien, gaiq mbouj ndaej bae gyoengqde hix mbouj yawjsiuj gou hix mbouj byaep gou, naeuz baez moq itdingh gaiq ndaej.

Gou cit ien geijcib bi, daengz geq cungjsuenq cingqcaen rox cit ien haihcawq lai, cungjsuenq gaiq ndaej ien lo. Gou aeu gangj aen goj cit ien miz haih gou hawj lwglan dingq, son gyoengqde gaej cit ien.