Gou miz dahnuengx gyaez ning youh dwggyaez、coengmingz youh cab- heiq ndeu.

De bineix ndaej sam bi. Louz byoem dinjdet, song aen lwgda ronghliklik, aenbak iqet, doiq rwz couh lumj gyaujswj iqet nei. De miz seiz hawj vunz maij, miz seiz hawj vunz dwgcaengz, danhseih gou caeklaiq miz dahnuengx baenzneix ndeu.

Hawj vunz raen dwggyaez seiz, de dingq gou gangj dahraix. Gou baez heuh de couh gvaqdaeuj, couh lumj“nonnemlaeng”gou, neix gou couh sim- angq lai. Miz haemh ndeu, daxmeh caeuq daxboh bae danhvei gyaban, ndaw ranz cij miz gou caeuq dahnuengx, gou sij cozyez liux le, caeuq dahnuengx youq gyang dingranz loengh sa guhcaemz, gou heuh de guh maz, de couh guh maz, dou guhcaemz ndaej angq baenzmaz bae.

Hawj vunz raen dwgcaengz seiz, de hawj vunz simfanz dahraix. Miz baez ndeu, gou cingq sij cozyez, mwh bae cwzsoj dauqdaeuj, raen dahnuengx cingq bin youq gwnz daiz, dawz bit youq gwnz bonjcozyez gou veh haujlai aen’gvaengz caeuq diuzsienq. Gou simgip lo, dub de mbat ndeu, de mbouj haengj lo, couh gyaep gou dub gou. Gou fatheiq le mbouj leix de lo.

Yienznaeuz dahnuengx mizseiz cabheiq, danhseih gij yienghsiengq gvaizlingz dwggyaez haenx couh lumj bouxdenhsij ndeu, hawj vunz ndaw ranz dou sim’angq lai.

Gou gyaez dahnuengx gou.

(Couh Swjhanz)