Ndaw ndoeng miz duz roeghenj iq ndeu. Roeghenj iq ciengqgo ndeidingq lai lo, singyaem lumj boq dig ityiengh, “yizyih, yizyih, yih, yih, yizyih——” Hoeng seizde ciengqgo, yaep ndeu diuq daengz gwnz go faex neix, yaep ndeu diuq daengz gwnz go faex haenx, cungj dwg ngaem gyaeuj. De gig launyaenq, lau vunzlai nyi gij singyaem ciengqgo de.

Seizcin daeuj lo, doenghduz ndaw ndoengfaex yaek hai aen hoihlienzvuen ndeu, daihgya naeuz roeghenj iq ciengqgo ndei lai lo, heuh noucoengz iq bae cingj roeghenj iq daeuj camgya. Noucoengz iq daeujdaengz ranz roeghenj iq, doiq roeghenj iq naeuz: “Roeghenj iq, ndaw ndoengfaex hai hoih- lienzvuen, cingj mwngz bae ciengqgo!”

Roeghenj iq naeuz: “Gou mbouj bae law! Daihgya dingq gou ciengqgo, gou lau, gou mbouj bae.”

Daxmeh doiq roeghenj iq naeuz: “Gaej lau, daihgya gyaez dingq mwngz ciengqgo, mwngz couh wnggai ciengq hawj daihgya dingq ha. Bae ba, bae ba!” Roeghenj iq couh riengz noucoengz iq bae lo.

Hoihlienzvuen aen cezmuz ceiq doeklaeng, couhdwg roeghenj iq ciengqgo. Roeghenj iq diuq daengz gwnz daiz, yawjraen baenzlai doengzdoih yawj de, roxnyinh gig lau, ndawsim baez vueng, singyaem hix saenz lo. De ngaem gyaeuj, “yizhih, yizhih” —— Cij ciengq le geij coenz, couh caiq hix ciengq mbouj roengzbae lo, najhoengz le diuq daengz laeng daiz bae lo.

Roeghenj iq ndawsim gig nanzgvaq, hix mbouj caeuq doengzdoih gangj “caiqraen”, couh mbin ma ranz. Youq gwnz loh, de bungzraen duzroeggeuq iq cabheiq, roeggeuq iq naeuz: “Roeghenj iq, mbei iq, ciengqgo ciengq buenq ndeu, lij ciengq mbouj ndei dem.”

Roeghenj iq mbin dwk, mbin dwk, youh bungz- raen duzroeggacak iq baklai, roeggacak naeuz: “Roeghenj iq, caen saetnaj, ciengqgo ciengq buenq ndeu, lij ciengq mbouj ndei dem.”

Roeghenj iq ma daengz ranz, doiq daxmeh naeuz: “Baezlaeng gou caiq hix mbouj ciengqgo lo.”

Daxmeh naeuz:“Vunz riu mwngz, dwg mwngz mbouj dingj roengzbae, mbouj dawz go ciengq sat. Mbouj youqgaenj, baezlaeng mwngz lai ciengq hawj vunz dingq, mbei couh menhmenh hung hwnjdaeuj.”

Roeghenj iq dingq gij vah daxmeh, ngoenz- ngoenz lienh ciengqgo.

Miz baez ndeu, roeghenj iq mbin hwnj gwnz gemh, yawjraen haujlai roeggeuq, couh youq baihnaj gyoengqde ciengqgo. Duzroeggeuq cabheiq naeuz: “Gaej ciengq lo, gou mbouj gyaez bouxciengqgo mbei iq.” Roeghenj iq mbouj leix de, ciengq ha, ciengq ha, yied ciengq mbei yied hung lo!

Youh baez ndeu, roeghenj iq mbin ok ndoengfaex, yawjraen haujlai roeggacak, couh youq baihnaj gyoengqde ciengqgo, duz roeggacak baklai haenx naeuz: “Roeghenj iq, gaej yienj lo, gou mbouj gyaez bouxyienj launyaenq.” Roeghenj iq mbouj leix de, ciengq ha, ciengq ha, yied ciengq yied ndeidingq.

Roeghenj iq youh mbin daengz baihnaj duzgoep caeuq roegdiuqmbwn bae ciengqgo, duzgoep caeuq roegdiuqmbwn dingq le, cungj haenh de: “Roeghenj iq mbei hung lo, ciengqgo engq ndeidingq lo, biujcingz hix gig ndei. Roeghenj iq cinbu vaiq lai bw!”

Seizhah daengz lo, ndaw ndoengfaex youh gawjhengz baez hoihlienzvuen ndeu, roeghenj iq hix bae camgya. Roeggeuq iq caeuq roeggacak iq naeuz: “Roeghenj iq mbei iq, gaej hawj de ciengqgo.” Hoeng duzgoep caeuq roegdiuqmbwn cungj naeuz: “Roeghenj iq mbei hung lo, ciengqgo hix engq ndei- dingq lo.”

Hoihlienzvuenh hainduj lo, roeghenj iq boux daih’it hwnj daiz yienj. Baezneix, ndawsim de di hix mbouj vueng, ciengq ndaej rwenzrwz ndeidingq. Daihgya cungj dopfwngz goksasa, roeggeuq iq cabheiq caeuq roeggacak iq baklai hix dopfwngz, lij dop ndaej daegbied yiengj ne!