“Ah Byauh! Mwngz bouxhuk neix! Lij mbouj vaiqdi buetdeuz?”

Gizgyae, cienz daeuj gij sing hemq Ah Gunh gyoengqde, sing haenx liz ndaej gyae lai, gyajgyaj gyumq- gyumq, heuh mbouj ndiu gou. Duz saeceijrin gou gwih lumjnaeuz daengx roengzdaeuj mbouj buet lo, yawjyawj daizcaeq lajde, duzngwz hung mbouj- caengz cienq ndang gvaqdaeuj, cij raen de gikgyanggyang, aen ndang de niujnene nod dwk, lumj guh sezswd nei, ndang de yied suk yied dinj, yied suk yied saeq, cungj cingzgingj geiz- heih neix, hawj gou lau ndaej ca di lumz diemheiq lo!

Bienqbaenz iugvaiq lo! Gou nyinhnaeuz duzngwz hung neix gaenq bienqbaenz iugvaiq lo, youq gyang- ngoenz gingqyienz gamj guhfap, suk iq aen ndang, yaek bienqbaenz maz ne? Bienqbaenz duz iugvaiq aj bak haeb vunz? Bienqbaenz boux dahsau gyaeundei daeuj yaeuh vunz? Gaxgonq dingq vunzhung gangj gvaq gij gojgaeq geizheih, lij mbouj saenq geijlai, seizneix caenda yawjraen duzngwz youh raez youh hung, menhmenh bienq dinj bienq saeq, duz neix mbouj dwg iugvaiq dwg maz?

Song ga gou youh doek roengzbae lo, rinsangj laj saeceijrin gig gvangq, gou hix dieb mbouj onj, caeklaiq song gen got gaenj gyaeuj saeceijrin, cij mbouj deng doek roengzbae. Mbouj- gvaq, deng mbouj deng doek miz maz youqgaenj, duzngwz neix geijlai maenh’ak, de siengj gwn gou caen dwg yungzheih fouzbeij. Cijmiz seiz- neix dwg youq ndaw fangzhwnz, mboujnex, diuz mingh iq gou aiq yaek mbouj miz lo.

Ndigah gou aeu najbyak bae dawj gyaeuj saeceijrin, maqmuengh vaiqdi aenvih senz ndaej ndiu gvaqdaeuj, get lai lo! Get ndaej gou song da ok ronghrib, hoeng mbouj ndaej lumj doenghbaez guh loq dwglau fanndang couh rox ndiu gvaqdaeuj, neix mingz- mingz couhdwg caen.

Mbouj dwg fangzhwnzloq, baenz- lawz ndaej ndiu gvaqdaeuj ne? Doenghbaez youq ndaw loq bungz daengz maz ndeilau seiz couh gaenjgip maqmuengh ndaej ndiu gvaqdaeuj, baez byaengq da couh ndaej lizhai aen loq dwglau. Seizneix gou dauqfanj siengj youq ndaw loq dwglau, seizneix danghnaeuz youq ndawde geijlai ndei!(caengz sat)