Doenghbaez, youq baihbaek Dinghcunh miz benq doenghnaz he, gvangq miz saek haj、roek leix, miz diuz gaeu benj ndeu, diuz gaeu neix gig hung, hung ndaej song duz max youq baihgwnz caez buet. De daj ndaw gamj baihdoeng doenghnaz maj okdaeuj, itcig maj daengz Nizlingj baihsae doenghnaz bae, dawz doenghnaz faen baenz song benq, caemhcaiq lanz gij roen bae doenghnaz.

Bingzseiz, vunz dangdieg goj ndaej daj baihlaj diuz gaeu neix ndonj gvaq, roxnaeuz daj baihgwnz de hamj gvaq. Hoeng, gij vunz baihrog couh mbouj ndaej yienghneix lo, gyoengqde byaij daengz baihnaj diuz gaeu neix, cij ndaej danqheiq ndwi. Aenvih mwngz yaek daj laj de ndonj gvaqbae, de couh daemq roengzdaeuj laengz; yaek daj baihgwnz hamj gvaqbae, de youh yo hwnjdaeuj lanz. Vihneix, gyoengqvunz cungj heuh de guh “gaeu saenz”. Vunz baihrog byaij gvaq dieg neix cungj haemzfwdfwd, hoeng, cungj mbouj gamj bae nyex de.

Ngoenz ndeu, miz boux vunz heuhguh “Cienleixda” ndeu, de gwih duz maxhau ndeu gvaq doenghnaz, deng diuz “gaeu saenz” dangj mbouj ndaej gvaqbae. “Cienleixda” nyapnyuk dangqmaz, de yut ok fagcax hung daiq youq gwnz ndang, raemj diuz “gaeu saenz” baez ndeu. Doeklaeng diuz gaeu neix goenq lo, lae haujlai lwed okdaeuj.

Gij lwed “gaeu saenz” lae le sam hwnz sam ngoenz, lae daengz ndaw naz Mbanj- lungzgvanh couh dingz lo, nyumx namh ndaw naz baenz saekhoengz bae. Ngoenzneix gij namh ndaw naz Mbanjlungzgvanh lij lumj lwed nei ndingnde’nde, ndigah vunz dangdieg couh heuh gij doenghnaz neix guh “Naz- nding”.

(Veiz Sangyungz hoiz)