Byawz mbouj gyaez vunz haenh, byawz cix muengh vunz ndaq? Mbouj miz saek boux muengh. Moix boux vunz cungj maqmuengh ndaej daengz bouxwnq haengjdingh caeuq danqhaenh. Danqhaenh lumj ndit, hawj vunz raeujrub, hawj vunz ronghsag, hawj vunz simva hailangh. Hawj di ndit couh rox did nyez, ronghsag daengx goqdangz, ronghsag daengz lwgnyez.

Gou dwg ndaw hagdangz cungjvu cujyin, guenj gij hong fuzbinz, caiq hwnj haj nienzgaep Yinghyij, saeh maet saeh ma lai lumj ndaundeiq. Gou ciengz gyaban cingjleix caizliuh, gig noix miz seizgan dinghsim roengzdaeuj ngeix baenzlawz son ndei baenzlawz hawj hagseng gyaez hag. Gwnz dangz, lauxsae caeuq hagseng mbwqmbangmbang, caenh- guenj gou gangj dwk bakbongz, caengz dwk dadek, swenj dwk sing gya bae, lijdwg mbouj miz yungh.

Ciuq saed gangj 50 boux hagseng suenq maz lai, son’gyauq youh miz maz nanz? Hoeng, gyoengq hagseng cix mbouj lumj raeuz yienghhaenx siengj, bouxboux baklai bebbeb fajfwngz yaekyaek yonq- yonq. Gwnz dangz, gou gangj gawq vah ceiq lai couhdwg:“Cingj andingh!” Hoeng, mboujguenj gou baenzlawz hemq, gyoengq doengzhag lijdwg cauzyebyeb, haujlai nanz cij menhmenh andingh roengzdaeuj.

Moix dangz goq caenh miz 35 faencung, gou cix yaek yungh ca mbouj geijlai 5 faencung daeuj daezsingj hagseng andingh nyinhcaen dingq gou hwnjdangz. Moix cou cij miz 3 dangz goq Yinghyij, mwhlawz cij ndaej son liux? Siengj daengz neix, gou gyanghwnz ninz da mbouj laep, saeh maet saeh ma doxgyaux, mbouj daengz 40 bi, gou cix byoem hausaksak lo.

Byaij youq laj daengngoenz, yawj ndit ndat ronghsag, muengh va hai hoengzswg, dingq roeg ciuzdedded, gou simva hailangh, ndawsim hix caemh miz lai cungj siengjfap: Langh hawj hagseng lai di ndit, lai di danqhaenh, ndaej mbouj ndaej gaijbienq gij daidu gyoengqde ne?

Miz ngoenz ndeu, gou byaij daengz bakdou gyausiz, ndaw gyausiz lumj rongzrwi nei cauz- yubyub, gou heiq hwnjfoedfoed, yut hoz sing sang naeuz:“Vangz Gijcwn!” Ndaw gyausiz sikhaek dingh roengzdaeuj, bouxboux cienq gyaeuj yawj coh de.

Gangj daengz Vangz Gijcwn, bouxvunz coengmingz lingzleih, hoeng gig naj mbaeu, souh mbouj ndaej vunz naeuz, danghnaeuz byawz menh- menh gangj daengz de, mbouj gvaiq mbouj ndaq, de hix naj hoengznyannyan, mbouj geij nanz lij raemxda doekbyoegbyoeg.

Vangz Gijcwn ngaemgyaeuj roengzdaeuj, faj- naj sikhaek hoengznyannyan, hoengz daengz byai rwz bae, raemxda couh youq gvaengxda de cienq- loekloek. Gou nyaenj sing daemq menhmenh gangj naeuz:“Gyoengq doengzhag, gou heuh mingzcoh de, mbouj dwg aenvih de cauznauh, cix dwg aenvih de naengh dingh hagsib, haxbaenh sou caezgya gangj vah cej riu cej angq, cij miz de boux dog gaem bit yawj saw caj lauxsae.” Gou yied gangj sing yied daemq, saenzcingz yiemzsuk. Ndaw gyausiz yied daeuj yied caem, lienz fagcim doek youq gwnznamh cungj dingq ndaejnyi, ciemhciemh dwk, gyoengq doengzhag boux gaen boux menhmenh dawz bit ceij okdaeuj, naengh dwk sohfwd caj gou dingqsij. Diet aeu swnh ndat cauh, lwg aeu gibseiz son. Gou riu dwk naeuz:“Gijcwn dwg buengjyiengh raeuz aeu hag, muengh caezgya ngoenzngoenz lumj seizneix, bibi va hailangh, hagsib cinbu sadsad.” Sing dopfwngz sawqmwh “dop、dop、dop……” Yied daeuj yied gok, bouxboux naj riu lumj va hai, gou hix caemh riu lo. Daj baezneix hwnj, moix dangz goq Vangz Gijcwn cungj gig nyinhcaen, cozyez daiqdaeuz guh ndei, hagseng wnq raen de baenzneix, hix riengzlaeng gaenxhag, gou roxnyinh simsoeng haujlai, cingzcik gyoengqde hix yied daeuj yied ndei.

Seizneix dauqngeix, bingzseiz haujlai seizhouh, vah doxfanj daeuj gangj couh lumj daengngoenz ngamq hwnjdaeuj nei, raeujrub ronghsag, dingq le hawj vunz lumj ndaej rumzcin cifidfid. Baezhaenx gou heuh de le, yaek ndaq de hix caeuq bouxwnq gangjdedded, hoeng fwt siengj daengz gij beizheiq de caeuq bouxwnq mbouj doxdoengz, cij laemzseiz gaijbak, byawz liuh daengz guh ndaej ndei.

Bi 2016 dwg gou guhhong ceiq nyaengq lo. Moix baez hong nyaengq mbouj ndaej guenj hagseng baenzlai, gou couh cagaenj bae caeuq hagseng raennaj, gangj mingz yienzaen, daezok iugouz, caiq habdangq anbaiz cozyez. Gyoengqde gag haengj hag, nyienh roengzrengz bae hag. Haggeiz sat, gij cingzcik gaujsi mbouj ca gvaq banh wnq.

Seizneix, gou siengj gangj, hagseng dwg aenceh, hawj di ndit couh rox did nyez, boux guh lauxsae ndawsim cang miz aen daengngoenz raeujrub he, dawz ndit ciuq coh gyoengqde, haeujsim bae ganq, cungj miz ngoenz he ndaem baenz benq ndoeng ndeu.