Mbaw dozveh beixmbauq nem youq gwnz ciengz de, gou guhlawz cungj yawj mbouj rox ne.

“Gwnzde veh gijmaz ne?” Gou cam beixmbauq naeuz.

Beixmbauq riu gou: “Mwngz huk lai, deihdoz goj mbouj rox, dwg deihdoz Cungguek go.”

“Vihmaz heuh deihdoz Cungguek ne?” Gou mbouj rox lo.

Beixmbauq youh riu gou naeuz: “Mwngz huk dahraix! Cungguek raeuz gizgiz cungj veh youq gwnz neix, yienghneix couh heuhguh deihdoz Cungguek lovei.”

“Biengz raeuz gizneix, ranz raeuz veh youq gizlawz ne?”

Beixmbauq youh riu gou naeuz: “Caen dwg daeghukiq dahraix! Gaej naeuz aen lueg iq baihraeuz mbouj miz mingz neix, couhsuenq dwg aen cin beix doegsaw de, cungj mbouj veh hwnjbae bw.”

“Beix mbouj dwg naeuz Cungguek raeuz gizgiz cungj veh hwnjbae luma?” Gou lij caengz rox dem.

“Daeghuk! Daeghuk!” Beixmbauq riu gou huk, mbouj han gou, hoeng de couh son gou yawj deihdoz, naeuz baihgvaz deihdoz dwg baihdoeng, baihswix dwg baihsae. De vix baihgvaz deihdoz naeuz: “Baihneix dwg baihdoeng……”

“Aiya, beix ha, beix huk lai lo. Beix youq hagdangz guhlawz hag ne?” Mbouj caj beixmbauq gangj sat, gou couh raen ndeiriu. Beixmbauq naeuz baihgvaz deihdoz dwg baihdoeng, baihgvaz mbouj dwg baihsae ma? Gou vix aen bakdangq baihgvaz deihdoz de, daj bakdangq dingjlingz yawjraen daengngoenz doekcongh: “Bohmeh naeuz gvaq, daengngoenz dwg daj baihdoeng okdaeuj, daj baihsae doekcongh. Bouxboux cungj rox aen dauhleix neix, doenghgij lwgnyez iq gvaq gou de cungj rox bw.”

Hoeng beixmbauq riu gou dem: “Caen dwg daeghuk dahraix!”

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）