Vahsug gangj ndaej ndei：“Mbouj miz boux lawz ndei caez.” Raeuz bouxlawz cungj miz gezdenj, aen gezdenj ceiq hung gou dwg lujlaj. Cozyez mbouj daiq dauq ranz、ndangdaenj lumz daiq dauq、yenzbiz gaucat deng law bae, gijneix doiq gou daeuj gangj dwg saeh gingciengz miz, danhseih miz baez ndeu sawj gou lumz mbouj ndaej.

Duenh sujgyaj gou bae Nanzgingh camgya ginhsw yalingyingz. Ngoenz ndeu banringz, dou bae yenjbodingh yawj denyingj. Gou duet aenmauhbing coq bangxhenz, simmaez dangqmaz yawj denyingj, denyingj cuengq sat lo, sim gou vanzlij caem youq ndaw denyingj, dan dawz le aenboiraemx dauq, gingqyienz lumz dawz aenmauhbing lo. Ngamq okbae mbouj geijlai nanz, couh roxnyinh ngoenzneix daengngoenz coeg da lai, hix roxnyinh gwnz gyaeuj hoengqhangq, baez lumh, gag sup gaemz heiqliengz ndeu. Dai lo, aenmauh mbouj youq gwnz gyaeuj lo, haengjdingh deng law lo. Danhseih baenzlawz ra hix ra mbouj raen.“Neix baenzlawz guh ne? Gou haengjdingh deng bouxgyaugvanh ndaq lo, mboujnex gou bae ndoj youq ba.”Baenzneix ngeix le, gou caenhliengh gungj ndang youq, maqmuengh bouxwnq bang gou dangj aen’gyaeuj haeuj.

Danhseih gou aen’gyaeuj hung baenz- neix bae, naeuz dangj couh dangj ndaej ha? Mbouj gvaq yaep ndeu couh deng boux- gyaugvanh yawjraen lo. Bouxgyaugvanh hawj duivuj dingz roengzdaeuj, byaij yamq hung daeuj coh gou, caemhcaiq haenq- sing cam naeuz:“Aenmauh mwngz ne?”Gou mbajbodbod naeuz:“Gou、mauh gou, ra mbouj raen lo.”Bouxgyaugvanh nyouq bwncaeuz, hat naeuz:“Aenmauhbing cungj deng law, mwngz lij daeuj neix guh maz?”Gou najmong dwk ngaem gyaeuj youq.“Haemh neix gvaq bangunghsiz gou daeuj!”“Ndei!” Gou saenzdaeddaed han naeuz.

Daengz banhaemh lo, gou sim diuq hwnj diuq roengz buet daengz aen- bangunghsiz bouxgyaugvanh. Cij raen bouxgyaugvanh cingq naengh youq giz- haenx caj gou, gwnz daiz coq miz aen mauhbing moqsemq ndeu.“Ne, hawj mwngz bw, sawq daenj yawj!”Gou baez daenj, hung iq cingq ngamj, gag cuengq gaemz heiq ndeu. Bouxgyaugvanh naihsim doiq gou gangj:“Aen mauhbing yienjok gij viyiemz caeuq saeqnaeh bouxbing, dwg gij byauhci cunhyenz bouxbing, langhnaeuz mwngz mauhbing cungj deng law, vanzlij camgya gijmaz ginhsw yalingyingz ne?”Gou najmong dwk youh ngaem gyaeuj roengz- daeuj.

Aen sibgvenq nyauq lujlaj gou mbangj dwg saeh’iq, danhseih gou aeu yungjgamj doiq gij mbouj ndei gou, haenqrengz gaij de bae.

(Ginh Cinzno)