Geiq ndaej Aulungzgveiz gaenq gangj gvaq, duz ngwz hung goj aeu byairieng guh din, daengx ndang lumj diuz faexsaux nei daengj hwnjdaeuj, couh lumj dwk naq nei mbin okbae. Giz gou ndwn mboujsuenq sang, cijaeu ndang de daengj dingz he, couh ndaej haeb din gou. Caiq gangj gou gaenq ndwn mbouj maenh lo, lauheiq mbouj aeu deq de daengj ndang, couh yaek gag doek roengzbae, doek daengz henz bak de deng de haeb lo.

“Su——”

Sing yiengj ndeu, lwgda gou baez laep, duzngwz hung daengj hwnj ndang yaek haeb gou lo! Daengx ndang gou baez unq, doq got maenh gyaeuj saeceijrin, ca di couh yaek doek roengzbae lo. Lwgda gou youh dauq rongh lo, cij raen diuz nyecuk deng gveng daengz henz, youq gwnz benjrin diuq le geij mbat, vang youq cungqgyang duzngwz hung caeuq saeceijrin, duzngwz hung beij nyecuk hung lai lo. Gou rox diuz nyecuk duh faglem “Lij Bu”, Ah Gunh simndei yaek bang gou, daj gwnz mohgungj gveng gvaqdaeuj haep duzngwz hung, hoeng gou yousim baenzneix duzngwz neix dauqfanj deng gik, engq haenq daeuj haeb gou……

Gizsaed, seizde gou maz cungj mbouj siengj lo, linjbyubyu ndaej gij hoenz gou cungj deng sanq caez, mbwn baenqlulu, mboek saenqfwen- fwen, saeceijrin yauzngengngeng, ndang gou hix saenzdwddwd, song fwngz mazmwnh dwk bae got gyaeuj duh saeceijrin, song din mbouj dingqgangj gwq conj roengz, duzngwz hung cijaeu loq ngiengxgyaeuj iet hoz, couh ndaej haeb gaiq noh ga gou bae lo.

Gaej yawj nyecuk neix mbouj beij duzngwz neix raez mbouj beij de hung, hoeng, youq gwnz benjrin diuq le geij baez, gingqyienz hix haep ndaej duzngwz neix nyengh bae. Cij raen de youq gizgaeuq daengx le yaep he, loq daengj hoz, biqbiq diuz linxgaeq hoengzmaeq, aen ndang niuj dwk, baez baenq, nod coh baihlaj mohgungj bae. Gou gig sim’angq, gij hoenz dauqma dingz ndeu lo, guiz gyaeuj heuh coh Ah Gunh gyoengqde:

“Yawj ha! De bae ra sou lo!”

(caengz sat)