Seizneix daengx Cungguek,

Bae buek hoenx binghdoeg;

Dwg Vujhan ceiq doeg,

Hoenx coeg ndaej ceiq haenq.

Gij binghdoeg feiyenz,

Cienz hawj vunz gig rengz;

Banhlah daeuj daengz deng,

Cix seng ok nyapnyuk.

Raeuz Cungguek gij vunz,

Yaek ciengxlwenx yawhfuengz;

Gaej hawj binghlah cuenz,

Aeu muenx sim dingj hingz.

Cungj bingh neix banh riq,

Beij feihdenj lij haenq;

Raeuz caen lwgda raen,

Goj cibfaen lauheiq.

Cungj bingh neix bingh rangq,

Yaek aeu yawhfuengz ndei;

Bingh neix bingh boihseiz,

Raeuz aeu meiz(miz) banhfap.

Aeu cih yiemz dang daeuz,

Raeuz gaej hawj miz laeuh;

Yaek gaenj bae fuengz caeux,

Ndei coh raeuz vunzlai.

Deng cug boux cug cam,

Yaek cug ranz cug hwnj;

Cam daengz couh yaek lwnh,

Gaej swnh lwgnyez heiq.

Hwnjbauq yaek gibseiz,

Meiz(miz) vwndiz mbouj ceng;

Ciuq cidu bae hengz,

Cungj yaek deng cauhcek.

Ndaw singz caeuq gak mbanj,

Yaek ranzranz guenj caez;

Gaej hawj luenh haeujbae,

Daihgya caez louzsim.

Gaej luenh bae dajcunz,

Fuengz binghdoeg haeuj ndang;

Youq ranz hix dwg bang,

Doiq lwglan fucwz.

Youq ranz yaek haeujeiq,

Hawj hoengheiq riuzdoeng;

Yawhfuengz mbouj cuengq soeng,

Cueng doeng binghdoeg deuz.

Nyengh aeu deng okbae,

Gaej lumz daep goujcau;

Cibfaen miz bizyau,

Baedauq yaek swiq fwngz.

Geiz cienzlah ndaej hoengh,

Guenjleix aeu loengh ndei;

Cwngfuj vwnzgen meiz(miz),

Aeu guh ndei fuengzre.

Fuengzre ceiq cungyau,

Baugau aeu gibseiz;

Daihgya yaek geiq ndei,

Neix gven daengz vunzlai.

Gangj bae youh gangj dauq,

Fuengzre cungyau lai;

Rox fuengzre dwg gvai,

Raeuz wnggai gag rox.