Ngoenzneix haeuj gyaeujcin,

Caenhsim daeuj eu fwen;

Fwen youq lueg bya rwenz,

Cienz seiq fueng bet baih.

Binghdoeg moq feiyenz,

Dangyienz fuengzhoh ndei;

Baenz gou youq gizneix,

Lwnh vunzlai caez rox.

Dangyienz aeu fuengzhoh,

Binghdoeg coh ndaw ndang;

Daegbied youq Vujhan,

Daih bang vunz deng gvaq.

Saedcaih yaek okdou,

Rox geiq daep goujcau;

Mbouj caeuq vunz doxgyau,

Gaej yungh lau binghdoeg.

Cwngfuj roengz banhfap,

Aeu cap max daeuj geiq;

Youq duenh seizgan neix,

Raeuz gaej luenh hwnjroengz.

Ndawranz hai conghcueng,

Vunz cuengq heiq couh soeng;

Heiq caeuq rumz ndaej doeng,

Binghdoeg roengz hoj youq.

Haeuj ranz sien swiq fwngz,

Gou mwngz caez geiq maenh;

Cawz doeg raeuz caemh faenh,

Ndangcangq caenh baengh raeuz.

Cawj byaek aeu cawj cug,

Cug di mbouj ndaej lauq;

Ndawranz aeu gaenx sauq,

Cijndaej bauj cinghseuq.

Aen dangj raeuz aeu saenq,

Gaej saenq vahgyaj riuz;

Mbouj dwg gangj vahriu,

Binghdoeg biu mbouj hingz.

Ndaw singz daengz lajmbanj,

Aeu ganjvaiq gag rox;

Ganbu caeuq nungzhoh,

Bouxboux goj geiq caez.

Danghnaeuz ndang mbouj cangq,

Gag rox rau ndangraeuj;

Langh fatndat hwnjdaeuj,

Couh caeux yawj canghyw.

Caeux yw caeux gekliz,

Ndei vaiq hix mbouj lah;

Binghdoeg doeg cixbah,

Daihgya mbouj yungh lau.

Buekguh caiq buekguh,

Binghdoeg mbouj nguh dingj;

Daihgya cungj sim dingh,

Vunz cingx hix ndangcangq.