Duzroeg ndonj gvaq gij rongh fwjgyaepbya gyaeundei de, eu gij fwen vuenheij de, vueng’vueng vatvat mbin dauq ndaw ndoengfaex bae lo.

Daengngoenz daenj gij fwjgyaepbya gyaeundei de, hamj gvaq dingjbya ceiq sang de, menhmenh maranz lo.

Duz gaeqmehraiz ranz raeuz, goj mbouj daengx mbouj duenh heuh cibngeih duz gaeqlwg de dauq ndaw roengq bae.

Meh ha, meh guhlawz lij caengz dauq ne?

——O, meh ha, gou lumzbae lo, meh haetneix bae baihrog guhhong lo, bae gizgyae’gyae de aeu yw, haemhneix meh mbouj dauqranz lo. Gou guhlawz lij lumj baezngoenz youq bakdou caj meh guhhong liux dauqranz ne?

Meh ha, seizneix meh gwn caeuz caengz ne? Meh gaej aeu raemxndat ceh haeux gwn bw, yienghneix couh deng dungxin bw——Dwg mwngz ciengzseiz yienghneix daengq gou bw.

Duznon seiqhenz baihrog ranz, guh- fwen nauhyied lai.

Aenmbanj mbiengj bya de, cienz daeuj geij sing ma raeuq.

Ronghndwen dingjbya, daj bakdangq iet fajnaj luenzlulu de haeujdaeuj, daengz gyanghwnz lo.

Meh ha, mwngz guhlawz lij caengz ninz ne?

——O, meh ha, gou lumzbae lo, meh ngoenzneix okbae guhhong, bae gizgyae- gyae de aeu yw, haemhneix mbouj dauqranz ninz lo. Gou guhlawz lij lumj baez ngoenz ninz ndiu couh heuh meh, yawj meh youq mbouj youq henz ndang ne?

Meh ha, seizneix meh ninzndaek caengz ne? Meh gaej iet genfwngz ok ndaw moeg daeuj bw, yienghneix couh dwgliengz bw——Dwg mwngz ciengzseiz yienghneix daengq gou bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngz- meh/卢奋长 hoiz）