Haemh caemrwgrwg, gou naengh youq laj daeng ciensim doeg bonj saw《Gou Haenh Guekcoj》neix, ndaw sim gou roxnyinh miznaj fouzbeij.

Vunz guek raeuz dwg vunz miz cingsaenz cauhguh hungmbwk haenx, guek raeuz ciuhgeq couh miz seiq daih fatmingz seiqgyaiq riuzmingz. Seizneix, guek raeuz miz 56 aen minzcuz, moix aen minzcuz cungj miz vah swhgeij, miz di minzcuz lij miz cihsaw swhgeij. Lumj raeuz Bouxcuengh couh miz cihsaw swhgeij. Youq ndaw lwgda gou, Sawcuengh raeuz ceiq hawj vunz simmaez, youh dwg ceiq ndeiyawj! Vahcuengh raeuz dwg cojcoeng raeuz seiqseiq daihdaih cienz roengzdaeuj, Sawcuengh raeuz, dwg Gozvuyen vih raeuz cauh okdaeuj! Ndigah, raeuz miz maz lijyouz mbouj gyaez Vahcuengh raeuz? Mbouj hag Vahcuengh Sawcuengh raeuz? Mbouj dawz Vahcuengh raeuz cienz roengzbae? Hagdangz raeuz, Sinhlungz Siujyoz mboujdan son Sawgun, lij son Sawcuengh dem；youq dieg Gvangjsih raeuz gwnz baizdou gak aen cwngfuj danhvei cungj yungh Sawcuengh Sawgun sij bw. Couh lienz gwnz mbawngaenz raeuz, hix yaenq miz Sawcuengh lumj Cunghgoz Yinzminz Yinzhangz geijlai geijlai maenz gij cih neix. Sawcuengh raeuz geijlai ndeidingq ha! Geijlai mizyinx ha! Ndigah raeuz wnggai gyaez Vahcuengh raeuz, hix aeu nyinhcaen hag ndei Sawcuengh raeuz. Moix mbat miz vunz cam raeuz dwg aen minzcuz lawz. Raeuz wngdang miznaj dwk lwnh de:“Gou ndaenggon, gou dwg vunz Bouxcuengh. ”

Bouxcuengh raeuz miz haujlai ngoenzciet, lumj haemhndaep、sam nyied sam ciet hawfwen、seiq nyied cobet ciet duzvaiz……Gij ngoenzciet Bouxcuengh neix ceiq nauhyied dwg sam nyied sam. Moix bi daengz ngoenz haenx, raeuz vunz Bouxcuengh bouxboux cungj sim’angq dangqma, daxbuz haetcaeux couh naengj ngaiznaengj haj saek youh hom youh ngdeiyawj, hawj mwngz yawj le myaiz laebyoegbyoeg bae, mwngz nyaenx mbouj ndaej bae nyaeb gwn, va, ngamq daengz ndaw bak, couh hom daengz ndawsim；daxgoeng、daxboh gaj gaeq gaj bit、naengj nohgoeb, yaek dakdaih caencik baengzyoux；dahcej、daeggo muengz dwk cangndang gyaeugigi yaek ganj bae hawfwen eu fwen. Ngoenzhaenx gwnz nazmbaeklae、gwnz bo、diegbingz vunz cien vunz fanh, dauqcawq cungj ndaejnyi sing fwen goksasa、sing riu riuhaha, mbanj Bouxcuengh raeuz bienq baenz haij singfwen, bienq baenz haij vuenzyungz.

Doeg sat bonj saw 《Gou Haenh Guekcoj》 neix, gou vih guekcoj raeuz ngoenz yied ngoenz ak ndaenggon fouzbeij, gou hix vih raeuz Bouxcuengh saedceij ngoenz beij ngoenz vuenyungz roxnyinh miznaj! Gou gyaez guekcoj raeuz, gou gyaez minzcuz raeuz! Gou dwg vunz Bouxcuengh, gou ndaenggon!

（bouxlauxsae son’gyauq: Lungz Gingyi/龙庆煜）