Ah Veij vuengmuengz cangguh Cangh Feih bae ra fagnangx, de fan gij rum, youq laj faexcaz ra, “hoenx- ciengq” baihneix gaenq camhseiz daengx roengzdaeuj lo. Lij Bu caeuq Liuz Bei、 Gvanh Yij cungj diemheiq gwdgwd, caj Cangh Feih ra ndaej fagnangx le caiq hoenx, yawj daengz doeklaeng sam bouxak hoenx Lij Bu dauqdaej dwg byawz saw byawz hingz. Gou couh gwih youq gwnz saeceijrin, saeceijrin deng ndit dak, caekhaex gou deng nad ndaej ndatfwdfwd, neix dwg saeh iq, guh ginhswh vix gyoengq bing baenzlawz hoenx engq youqgaenj. Ah Veij numqnwtnwt lij caengz ra ndaej fagnangx, gij huj gou gaenq daj caekhaex bongh hwnj gyaeuj lo.

“Cangh Feih! Vaiqdi ha!”

“A, duzngwz! Duzngwz hung!!” Ah Veij fwt swenj sing ndeu, cienq ndang couh buet coh baihneix daeuj.

Daihhaj Bungz Duzngwz

“Dahraix?” Ah Cang baez ndaej- nyi miz duzngwz, couh nyengh lo.

“Gaej haep vunz! Gou Lij Bu dwg lajmbwn daih’it, lij lau duzngwz?” Ah Gunh hemq.

Gou rox Ah Veij mbouj nyienh dang Cangh Feih, ginhswh deng gou guh lo, de mbouj fug, youh mbouj ndei caeuq gou doxceng, couh siengj ok aen fap neix daeuj, mbouj siengj caemz aen youzheiq “sam boux’ak hoenx Lij Bu” neix, ndigah gou cungj mbouj yawj de da he, laebdaeb vifung sadsad hemq:

“Cangh Feih mwngz mbouj dingq mingling, gangj byangz lox caezgya, gou yaek faenz aen gyaeuj mwngz bae!”

“Vaiqdi buet, caen miz duzngwz hung he!” Ah Veij vuengmuengz daj ndaw byozfaex buet dauq, Ah Giuh caeuq Ah Cang vut gij “vujgi” ndaw fwngz, gaen Ah Veij coh gwnz mohgungj bin bae. Gou cingq ngeizvaeg seiz, Ah Gunh gaenq vad “faglem” ndaw fwngz, buet coh Ah Veij, daiq miz gij vifung haxbaenh hoenx hingz songde, daih hat sing ndeu:

“Iu’gvaiq daj gyawz daeuj, gingqyienz gamj ra gou Lij Bu……”

Sawqmwh, gij sing hat de daengx roengzdaeuj lo, gij vah caeuq gij yiengh daj gwnz daizheiq hag ndaej haenx baez yaep da couh mbouj raen lo, doq cienq ndang, rag gyaeuj “faglem”, gvanghbeuz dauqma.

“Duz ngwz hung he, gouqmingh!”

Gij dungcoz diuqgah caeuq gij swenj dungxliengz Lij Bu hawj gou doeksaet yat, mbouj rox mbouj nyinh gag gaenjcieng hwnjdaeuj. Baez cienq ndang yawj coh baihlaeng, fwt miz duzngwz hung monghau doxgap, caemhcaiq miz gen gou baenzneix hung, gyaep youq baihlaeng Ah Veij, byozrum gwnznamh deng diuz rieng de baij ndaej bibi buengqbuengq, dwglau dangqmaz!

“Vaiqdi! Vaiqdi! Ah Gunh!”

(caengz sat)