Sai:

Gou dwg vunz lajmbanj,

Ranz youq gwndaenj ca,

Haeujok deng bin bya,

Baengh song ga guh rengz.

Mbwk:

Gou bouxrungh bya sang,

Ngangx(ngiengx) gyaeuj mauh hix

doek,

Ndaem haeux fouz namh moek,

Dwk loek fouz raemx lae.

Sai:

Rap fwnz bae haw gai,

Haeuxngaiz youq gwnz mbaq,

Miz bouxhek haeuj ma,

Fouz haj(lauz) cawj byaekndoeng.

Mbwk:

It bi daengz seizdoeng,

Rap doengj bae aeu raemx,

Byaij yamq sang yamq daemq,

Mbouj laemx suenq mingh ndei.

Sai:

Gaijfang geijcib bei(bi),

Raeuz raen ndei liux nauq,

Bya sang bienqbaenz bauj,

Rungh laux bienqbaenz ngaenz.

Mbwk:

Ndaw rungh mbouj caiq ca,

Byabya caux goengloh,

Roen doeng daengz lajroq,

Byaij loh ndaej laep da.

Sai:

Gizlawz miz ranz gaeuq,

Guh ranzlaeuz gaijcau,

Hawj ngaenz daeuj lingh caux,

Laux nyaeq youq onjdingh.

Mbwk:

Ndaem haeux mbouj gyau suiq,

Guh ndwi youh bouj ngaenz,

Ciuq menciz bae faen,

Ngaenz bae daengz gak hoh.

Sai:

Guh hozcoz yihliuz,

Diuz neix caen dwg ndei,

Yw bingh ndaej mienxfeiq,

Raeuz mbouj heiq gijmaz.

Mbwk:

Roekcib bi bouxgeq,

Deq aeu ngaenz ciengx mingh,

Ndwen ndaej it bak lingz,

Bak bi lingh gya lai.

Sai:

Ndaw rungh doeng vangjloz,

Gangjgoj fuengbienh lai,

Bouxmbwk caeuq bouxsai,

Daihgya fwen doxcoh.

Mbwk:

Youq vangjloz seizdaih,

Gaicawx mbouj okdou,

Yaek gai yiengz gai mou,

Hai soujgih couh baenz.

Sai:

Saehndei miz lailai,

Saedcaih gangj mbouj liux,

Song raeuz fwen eujeuj,

Baenz beuj(buen) daengq maranz.

Mbwk:

Saehndei miz lailai,

Saedcaih gangj mbouj caez,

Daj ngoenzneix doxbae,

Ndaejhoengq caiq daeuj lwnh.