Haeuxnaengj haj saek, ndaejnyi gij mingzcoh couh rox ndawde miz haeux haj saek, saekndaem、saekhoengz、saekhenj、saekgyaemq、saekhau 5 cungj saek.

Haeuxnaengj haj saek dwg aeu doenghgo nyumx baenz. Saekndaem dwg aeu mbaw goraeu daeuj guh, saekhenj dwg aeu vamai daeuj guh, saekhoengz caeuq saekgyaemq cungj dwg aeu go- gyaemq daeuj guh, gij mbaw go’gyaemq oiq cawj raemx le couh dwk haeuxcid baenz saekhoengz, gij mbaw go’gyaemq laux cawj raemx le couh dwk haeuxcid baenz saekgyaemq. Saekhau couh mbouj aeu maz doenghgo daeuj nyumx saek lo, aenvih gij saek haeuxcid couhdwg saekhau.

Haeuxnaengj haj saek dwg gij gwn cietheiq ciuhgeq vunz Bouxcuengh daihdaih cienz roengz- daeuj, binaengz liggaeuq sam nyied cosam roxnaeuz cingmingz, cungj aeu guh haeuxnaengj haj saek. Vunz Bouxcuengh gig gyaez haeuxnaengj haj saek, guh le maqmuengh bonjfaenh yienghyiengh habhoz, haeux fag mak baenz.

Haeuxnaengj haj saek hoengz gyaemq dox- gyaux, henj hau doxcab, ronghsien ndeiyawj, feihdauh hom youh van, gwn hwnjdaeuj hawj vunz nanzlumz, gwn le youh naemj caiq gwn, cungj gwn mbouj nywnx.

Bineix sam nyied sam youh guh haeuxnaengj haj saek, gou doq guh doq ngeix, guh baenz le aeu dawz bae caeq cojcoeng, maqmuengh caezgya ndangdaej ndeiraeuh, vuenyungz gvaq ngoenz.