“Cangh Feih vaiqdi daeuj ha!” Ah Giuh riu dwk swenj, de gaenq daengj gaiq benj nduk ndaw fwngz youq gwnznamh, aiq dwg naek lai song gen nanqgaux caez. Gou haeujsim yawj gaiq benj nduk de, ai! Yienzlaiz dwg gaiq benj nduk gaenq hwnj mwt duh faexhanxgyaeu.

“Cangh Feih, gou guh ginhswh mingling mwngz vaiqdi bae hoenx!”

Ah Veij gwih youq gwnz saeceijrin, mingling gou.

“Gou mbouj guh Cangh Feih!” Gou sawqmwh mbouj angq lo, roxnyinh bonjfaenh beij de maenh’ak, de suenq maz ne, gingqyienz mingling gou? Haxbaenh ukgyaeuj luenhgawh, seizneix caen guh Cangh Feih lo, mbouj saetnaj ha?

“Ah Veij,” gou byaij doxdauq doiq Ah Veij gangj:“Gou guh Gungj Mingz, mwngz guh Cangh Feih! Bae!”

Ah Veij nyengh lo, da daengx gou, de deng gou fwt bienqyiengh hwk lo, doq cam:

“Mwngz yaek caufanj? Dah- raix!”

“Mwngz hoed lai!” Gou nyinh- caen naeuz:“Gou dwg Cuhgoz Lieng, rox lwi? Mwngz cij dwg Cangh Feih! Danghnaeuz mwngz mbouj dingq gij vah gou, cij heuhguh cauhfanj lo!

“Gou mbouj nyienh guh Cangh Feih.” Ah Veij doi naeuz.

“Cangh Feih vaiqdi daeuj ha!” Ah Gunh gig daekeiq hemq:“Gou Lij Bu cingq deq ne! Sou miz mbouj miz Cangh Feih?”

“Vaiqdi ok fwngz!”

Gou vaxvad couh daj gwnz saeceijrin rag Ah Veij roengzdaeuj.

“Ndei, Ah Veij dwg Cangh Feih!” Ah Cang hemq.

“Gvaqdaeuj a!” Ah Gunh yaengx sang nyecuk, gig vifung.

“Lij Bu mwngz gaej daekeiq lai!” Gou gwih hwnj gwnz saeceijrin, vix Ah Gunh naeuz:“Cieng Feih dou bae ra fagnangx lo.”