Diuz rij raemx sawdikdik ndeu, daj gyang doenghnaz bingzbwdbwd naj mbanj dou lae gvaq. Ndawde miz vaengz haemq gvangq, dwg gizdieg dajcaemx vunzmbanj.

Song mbiengj rij cungj dwg nazboengz, baez daengz seizhah, nazboengz couh baenz gizdieg ndei guhcaemz guh’angq gyoengq nyezsai dou lo. Dou baez doek baez loq aenndang diuq haeuj ndaw nazboengz bae, lumj duz vaiz nei, youq ndaw nazboengz gyuek bae gyuek dauq, gyuek ndaej naezboengz haeuj ndaw ndaeng ndaw bak bae, daengx aenndang cawz song cehda, gizgiz gyuek nem naezboengz. Baenzneix cij ndaej benz daengz henz rij, caez doengzseiz diuq roengz ndaw rij. Daihgya youq ndaw rij doxgonh, yawj byawz ndaej swiq seuq naezboengz gwnz ndang gonq. Swiq seuq le, youh buet bae ndaw nazboengz dajringx, gyuek naezboengz rim ndang, caiq diuq haeuj ndaw rij bae swiq. Baenzneix fanfuk, cungj roxnyinh angqvauvau.

Gyuek naezboengz baeg le, daihgya couh doxdax ndaemraemx, hag youzraemx.

Guh ndaemraemx doxdax, mboujgvaq dwg doxdax byawz sup gaemz heiq ndeu caem youq ndaw raemx ndaej ceiq nanz, cix mbouj doxdax byawz ndaem ndaej ceiq laeg. Raemx ndaw rij mbouj laeg, giz ceiq laeg cij daengz laj hangz, mboujnex, bouxlaux hix mbouj cuengqsim hawj dou bae ndaw rij guhcaemz. Seiz doxdax ndaemraemx, youz boux ndeu youq gwnz hamq guh caizbuenq, dingq caizbuenq hemq hainduj le, daihgya couh doengzseiz ndaem roengz ndaw raemx bae, aen’gyaeuj byawz ceiq laeng loh ok gwnz raemx daeuj couh suenq hingz.

Hag youzraemx couh engq mizyinx lai lo. Dou sien cug gaenj song ga vaq, caiq dawz gyaeuj vaq aj gvangq, coh baihlaj baez goemq, dungx vaq couh cang heiq rim le, seizneix sikhaek dawz gyaeujvaq cug gaenj, geu vaq couh lumj aen anmax, dou dawz aen’aek gwih youq gwnz “anmax”, fwngz luenh vad, ga luenh dik, couh yienghneix hag youzraemx. Ngoenz bae ngoenz dauq, bi bae bi dauq, aenvih seiziq gou youq henz rij guhcaemz majhung, doeklaeng couh caen hag rox youzraemx lo.