Canghyw Husw Dwkhingz Ma

□ Loz Dauh / 罗滔

Bineix seizcin bonj vuenheij,

Mbouj ngeix raqyak fat Vujhan;

Rinndaek gik hwnj cien cik langh,

Nangqdaengz namz baek caeuq sae doeng.

Cunghyangh riengjvaiq guh gietdingh,

Vujhan fung singz raemj goek raek;

Baihgwnz roengzlingh bang Huzbaek,

Daengx guek sikhaek caez hengzdoengh.

Gwnzmbwn feihgih soengq canghyw,

Hojceh hwnzngoenz daeh haeux byaek;

Cien bing fanh max comz Huzbaek,

Yaek gaj binghdoeg bauj guek an.

Cib ngoenz guh baenz Hojsinzsanh,

Bangxhenz Leizsinz yaep couh baenz;

Fanghcangh Yihyen aen daeb aen,

Ligliengh cien gaen moeb raqfangz.

Canghyw mbouj lau bouxbingh naek,

Husw haethaemh mbouj yietnaiq;

Mbouj ngeix swhgeij lix rox dai,

Ndaw sim dan geiq lai gouq vunz.

Daengx guek lwgminz caez roengzrengz,

Doxgiet cihyenz swngj Huzbaek;

Hwnzngoenz daehyinh soengq haeux byaek,

Mbouj you gijgwn saek ndaw singz.

Gak yiengh yw moq laebdaeb ok,

Cungh Sih doxgap gvaq nanzgvan;

Bouxbingh ndang ndei ndaej maranz,

Rangh riu rangh byaij angqvauvau.

Dwkhingz raqyak bak va langh,

Ronghsag Vujhan caen vuenyungz;

Duet bae goujcau byaij roen hung,

Gwnz naj riunyumj coux rumzcin.

Canghyw husw ma soudoih,

Henz loh baiz doih coux yinghyungz;

Bohmeh beixnuengx angq gotumj,

Gwnz naj riunyumj raemxda lae.

Moeb dai raqyak hoenx hingz bingh,

Rumzcin ci daeuj yienghyiengh moq;

Gak guek lajmbwn caez cukhoh,

Yinzminz Cunghgoz goenglauz hung.

Youqranz Gekliz, Bouxboux Dingj Raq

□ Fwn’iq Rumzswnh sij ciengq Mbwn Heunaunau hoiz

Dangqnaj binghraq caen yiemzhaenq,

Cwngfuj haucau aeu dingqgangj;

Gat goenq goekdoeg caez okrengz,

Bouxboux ndangdaej cij ndaej cangq.

Fapgvi bouxboux daeuj ciuqsouj,

Youq ranz ra huq daeuj conzrom;

Caj daengz seizraeuj bak va hai,

Daihgya angqyangz caiq doxcomz.

Sinhgvanh binghdoeg rox cienzlah,

Daihgya ciengeiz aeu haeujsim;

Okdou bouxboux daiq goujcau,

Binghraq miz ngoenz ndaej hoenx hingz.

Gangjmingz: Fwen neix dwg Fwennaizdou Hwngzyen, youq saw ceiqlaeng coenz daihngeih caeuq coenz daihseiq haeujyinh.