Daxmeh dwk lailai duj ndokva rangh mbaw haeuj ndaw bingzgingq youh luenz youh raez de bae, aeu raemxyw ceh dwk, goeb fa de hwnjdaeuj, gwnz fa lij fung miz lab.

Ndokva ndaw bingz gyaeundei baenzneix, mbaw de heuswdswd. Daxmeh vuenheij lai, cam gou: Mwngz gyaez lwi? Ndeiyawj lai bw!

Gou mbouj gyaez! Meh ha, gou mbouj gyaez saekdi nauq.

Langhnaeuz miz vunz yienghneix dwk gou haeuj ndaw bingz bae, meh goj vuenheij lwi?

Gou mbouj gyaez! Meh ha, gou raen mbouj ndeiyawj saekdi nauq.

Langhnaeuz miz vunz yienghneix dwk meh haeuj ndaw bingz bae, meh mbouj cak mbouj ning, mbouj gangj mbouj ndwet, goj mbouj riu nauq, gou goj mbouj ndaej bongh haeuj ndaw rungj meh bae nauq. Meh ha, gou mbouj hawj vunz yienghneix guh bw, gou coj dub aenbingz de dek bae dahraix, hawj meh daj ndaw bingz okdaeuj. Couhsuenq meh ngoenzngoenz moeb gou, gou goj mbouj ngah hawj meh youq ndaw bingz nauq, meh ha!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）