Youq ndaw sujgyaj ngoenz ndeu banhaet, gou youq ndaw ranz sij cozyez. Sawqmwh, daj ndaw fuengz cienz daeuj sing duzroeg iq heuh, gou byaij haeujbae yawj, yienzlaiz dwg duzroeglaej iq dwggyaez ndeu, de cingq youq gwnz bohliz buekmingh vad song gaiq fwed de.

Gou gipmuengz gven bakdou caeuq cueng haeuj caez bae, coemjdawz duzroeglaej iq lo. Roeglaej iq youq ndaw fwngz gou mbouj miz banhfap cak ok, cij ndaej cici siliengz dwk heuh. Gou yungh diuz maehoengz ndeu cug din de, couhcinj de mbin hwnjdaeuj, hix mbin mbouj ndaej sang. Gou gyaez duzroeg, cij siengj caeuq de guhcaemz. Gou baez cuengq fwngz, roeglaej couh mbin hwnjdaeuj, hoeng, mbin ndaej mbouj sang, cij ndaej nyengqndang mbin coh gakciengz bae. De daengx ndang saenzdwddwd, yawj yienghceij de gig lau. Gou ngeix de gojnwngz iek luba, hix gojnwngz de aeu swhgeij gag caem yaep ndeu ba, gou couh cienq ndang bae aeu di haeux caeuq raemx cuengq youq ndaw dak hawj de, dajsuenq daengz haemh le caiq caeuq de guhcaemz.

Daengz banhaemh, gou bae yawj roeglaej iq, de mbouj heuh lo, dinghdingh ndwn youq gizhaenx, haeux deng de vaek ndaej dauqcawq cungj dwg, hoeng, mbouj raen miz maz noix. Raen gou byaij haeujbae, de youh mbin hwnjdaeuj, hoeng, yaep he couh doek roengzdaeuj lo, de doiq lwgda iq sikhaek yawj gou. Yawj da de, gou nyaenx mbouj ndaej hojlienz duz roeglaej neix, lau dwg duzroeglaej iq neix siengj baema ranz ba; lau seizneix bohmeh de cingq simyou dwk caj de baema ranz ne! Seizneix gou mbouj gaem de, lij hawj haeux hawj de gwn, hoeng, de vihmaz lij lau gou ne?

Gou mizdi siengsim lo, gou daj ndawsim gyaez duzroeglaej iq neix, gou gyaez dingq de heuh cicicaca; gyaez yawj de diuq hwnj diuq roengz; gyaez aeu song fwngz gou bae bang de roi bwn…Maqmuengh de louz youq henz ndang gou buenx gou doegsaw, hoeng, seizneix de mbouj gwn mbouj ndoet, song lwgda ngoenhngwdngwd, doiq fwed roemjramj mbouj miz rengz, yienghneix guh ne de couh yaek dai lo, de hix mbouj ndaej ciengqgo hawj gou dingq lo, gou sim’in ndaej lumj deng vunz aeu mid camz nei, raemxda nyaenx mbouj ndaej couh doek lo.

Gou uetuet raemxda, song fwngz siujsim gop dawz roeglaej iq, menhmenh byaij coh yangzdaiz, muenghmuengh gwnzmbwn gij fwj deng daengngoenz doek nyumx ndaej hoengzfwgfwg, gwnzmbwn geijlai gyaeundei ha, gou ndawsim gag haenh, fwngz dawz geuz raed diuz cag gwnz din duzroeg goenq bae, langh de mbin coh gwnzmbwn, muengh duzroeglaej iq yied mbin yied gyae, gou gaenq ngeix gva lo: Gou cuengq roeglaej bae, hawj de caiq ndaej youq gwnzmbwn swxcaih mbin…

Mbouj, dwg roeglaej cuengq gou, hawj gou aensim gyaez roeg riengz de itheij youq gwnzmbwn lamzsumsum mbin!（boux lauxsae son’gyauq: Lungz Gingyi/龙庆煜）