Fwn dingz lo, mbwn ok ndit lo, gwnzmbwn miz aen giuz gyaeundei he.

Boh ha, langhnaeuz lwg riuj aen huzraemx mwngz aeu daeuj rwed ndokva de byaij gvaq gwnz giuz bae, set raemx roengzdaeuj, yienghneix gwnzmbwn mbouj dwg doek fwn luma? Gou set raemxfwn coq suenyw gwnz bya, yienghneix mwngz cix mbouj hoj rap raemx bae rwed lo, mwngz angq lwi?

Meh ha, langhnaeuz lwg dawz aen gingq nduennduen mwngz aeu daeuj roi byoem de byaij gvaq gwnz giuz bae, gwnzmbwn mbouj dwg lai aen ronghndwen ndeu luma? Gou gaem ronghndwen rongh mwngz roi byoem, mwngz angq lwi?

Beixmbauq ha, langhnaeuz nuengx dawz aen- nungxnengh mwngz cug youq gofaex bakdou de bae venj coq gwnz giuz bae, gou naengh aennungxnengh bibi buengqbuengq, geu vunjraiz gou mbouj dwg bienqbaenz vangq fwj mbinyagyag luma? Mwngz yawjraen le, angq lwi?

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）