Duenh sujgyaj ndawde, ndaw bak gou miz swnj heujndungj ndeu ngauz bae ngauz dauq yaek luet lo, yaek doek youh doek mbouj ndaej ok.

Ngoenz haenx, swnj heuj neix ndaej conq yaek aeu cik, bingzseiz de in couh suenq gvaq, danhseih baez neix ne, in baenz gou bak hix hup mbouj ndaej bae, langh hup ne gou couh deng aeu fwngz goemq bak heuh“yoyo”nei. Cungj mbouj ndaej hawj gou baenzngoenz aj bak youq ba! Caiq gangj, vunz lumj diet、ngaiz dwg gang, donq ndeu mbouj gwn iek yaek dai! Neix gou couh gietdingh ciemz de bae!

Gou dawz aen gingq ndeu daeuj, aj bak, couh raen de. Gwnz“naj”de miz conghndaem hung ndeu, couh lumj gaiq ngeggoemq caeggeq nei, youq ndaw bak yienhda dangqmaz, gou laemxsim itdingh sikhaek ciemz de bae.

Gou iet song lwg fwngz haeuj ndaw bak bae, gaem dawz de cienq coh baih ndeu. Swnj heuj haenx lumjnaeuz miz rag nei, laemxsim mbouj siengj deuzbae,“cingj”hix“cingj”mbouj doengh de. Mbouj miz banhfap, cijndaej giengzmanz guh lo.

Gou gya haenqrengz niuj de. Hwzhwz, miz yungh dahraix, de baez di baez di cienqning lo. Gou baez cuengq fwngz, sawqmwh, de fwt dwk“cienq”ndang gvaqdaeuj,“A!”Dangseiz gou deng in lai raemxda doek lo, fwngz goemq bak haeuj nanznanz bae. Neix ne mbouj ndaej lau in lai lo, gvaq yaep ndeu, gou heijdaeuz ciemz baez daihngeih lo. Baez neix gou yaek guh vaiq baenz vaiq, gou fwt dwk yungh rengz, henz heuj lwed lae lo. Gou lwnh sou, lwed dwg bouxvunzdig gou, seizneix gou caen mbouj rox baenzlawz ndei. Couh yiengh- neix, daihgaiq guh le buenq aen cung, sawqmwh miz geu heiq hombyaek ndeu con haeuj ndaw ndaeng gou daeuj. Neix dwg daxmeh cingq guh byabyaeksoemj gou ceiq maij gwn haenx. Ngeix daengz banringz vunzranz ndaej gwn ndei gwn hom, danhseih gou cijndaej youq bangxhenz yawj, vanzlij dingj in dem. Gou baez hozndat, hemq naeuz:“Vihliux gijgwn ndei, buek lo!”Cij raen“sou”baez ndeu, swnj heujvaih haenx fwt buet okdaeuj lo.

Haha, gou ciemz heuj ok lo!

（Lij Bozyangz/李博洋）