Gaxgonq, miz duz yiengz iq ndeu, de daj seiziq couh miz aen loqsiengj ndeu, couhdwg dang boux bing ndeu.

Dang bing aeu hab iugouz: Coengmingz lingzleih, ndangdaej cangq, byom lai mbouj baenz, biz lai hix mbouj baenz. Da aeu raeh, heuj aeu caezcingj, mbouj ndaej mbit. Yiengz iq gijmaz cungj ndei, couhdwg byom lai, cazndang mbouj ndaej doenggvaq, neix yiengz iq simnyap lai.

Miz ngoenz ndeu, yiengz iq ra bouxbaengzyoux ndei noucoengz lwnh simsaeh. Noucoengz riunyumj naeuz：“Beixnuengx yiengz, mwngz mbouj dwg byom lai ma？Mbouj miz gvanhaeh, lai gwn haeux, gaenx lienh ndang, mwngz itdingh hab diuzgen dang bing, caemhcaiq gou simsaenq, mwngz itdingh miz saek ngoenz ndaej dang bing ha! Mwngz itdingh dwg bouxbing mbeilaux.” Yiengz iq dingq le, saenqsim cibcuk, de ciuq gij vah noucoengz bae guh, de geijlai maqmuengh miz saek ngoenz ndaej dang bing ha!

Gvaq geij ngoenz le, yiengz iq youh bae yawj noucoengz. Hoeng cungj mbouj raen noucoengz. Duzroeg mbin gvaqdaeuj lwnh yiengz iq nyi：“Boux- caeg roeggae dawz noucoengz gaeb haeuj congh- gamj bae lo, mwngz vaiq bae gouq noucoengz, gou bae lwnh hawj yiengz duicangj nyi.”

Yiengz iq baez dingq, sikhaek bae ra bouxcaeg roeggae, caen dahraix, youq ndaw aen gamj ndeu, ra ndaej bouxcaeg roeggae, de cingq coemh feiz, yaek gangq noucoengz ne.

Yiengz iq raen le, cung hwnjbae, aeu gaeu dingj bouxcaeg roeggae, baez goed, baez gvengq, baez caij, bouxcaeg roeggae deng sieng youqgaenj, lienzlienz gouz dwk. Yiengz iq siengj hawj roeggae gaij loek, couh cuengq roeggae bae. Siengj mbouj daengz roeggae mbouj gaij, swnh yiengz iq mbouj re, diuq hwnjdaeuj dot coh da yiengz iq bae, yiengz iq nyaenx insep caeuq roeggae buekmingh doxhoenx, doeklaeng, roeggae dai lo, noucoengz ndaej gouq lo. Hoisik, duz yiengz iq aen da ndeu fangz lo.

Seizneix, yiengz duicangj daiq aendoih gingjveidui gvaqdaeuj lo, rox gij ginggvaq gienh saeh neix lo, yiengz duicangj naeuz：“Gou cingqsik senhbu, ciepsouh mwngz baenz bouxbing cingqsik ndaw mbanj doenghduz ndeu.” Yiengz iq naeuz：“Gou mbouj hab iugouz, gou gig byom’iq, caemh- caiq seizneix aen lwgda ndeu fangz lo.” Gangj sat yiengz iq daej hwnjdaeuj lo. Yiengz duicangj naeuz：“Mwngz ndangdaej byom’iq, ndaej gyahaenq lienh ndang, mwngz deng da fangz le, mwngz dwg vih gouq noucoengz cix fangz, mwngz gig mbeilaux, mwngz dwg boux yinghyungz baet rwix cawz yak ndeu. Aen mbanj doenghduz aeu gyoengq cansw lumj mwngz baenzneix mbeilaux haenx, vih beksingq cawz haih, baujhoh aen mbanj.” Yiengz iq dingq le, gikdoengh dwk gangj mbouj ok vah.

Yiengz iq saedyienh loqsiengj ndaej dang bing lo, daj seizneix hwnj de engqgya roengzrengz lienh bonjsaeh, bauj aen mbanj doenghduz bingzan.

（bouxlauxsae son’gyauq: Vangz Gveiyangh/黄桂香）