——Haemhlwenz, duzroeg- gap mong deng duznouguk gamz deuz gvaq. Haemhneix, ndaw roengq roeggap gag lw duz roeggap hau gyaxgedged ndeu ndwi.

Valwgbaenq gwnz led ninz ndaek gvaq, duzroegenq gwnz yiemhranz ninz ndaek gvaq, roeggap hau ha, mwngz hij ninz vei.

Gaej daejnga’nga lai lo, roeggap hau ha, gaej saenq beixmbauq gou naeuz, gou goj mbouj saenq de naeuz ne——roeggap mong mbouj dwg hawj duznouguk gamz bae go! Duznouguk mbouj miz fwed, de mbouj rox mbin go.

Roeggap mong bae gizlawz liux ne? Guhlawz lij caengz dauqma ne?

Gou naemj, haetneix, de youq mwh mwngz caengz ninz ndiu de, gag mbin bae ndaw ndoengfaex louz lo. Mbangjbaez, de mbin bae gyae’gyanggyang nei, mbouj rox youq gizlawz deng mok raemhruru laepngaungau nei, loeng roen le, mbin mbouj dauq lo.

Ngoenzcog, mok sanq le, de couh dauqma lo.

Mbangjbaez, youq ndaw mok laep, de mbin bae daengz giz ndeindei youh gyaeundei dangq- maz ndeu——giz lumj bouxsien ndaw gojgaeq daxboh gangj de go. Gizde daengngoenz mbouj doekcongh nauq, gizde mbouj miz gyanghaemh, ndokva seizseiz cungj dwg hailangh youq gyang nditndat, duzroeg seizseiz cungj dwg guhfwen youq laj raemh- faex……Roeggap mong mbouj ngah deuz, yienghneix couh lumz doxdauq lo.

Hoeng, roeggap coj miz ngoenz ndeu dauqma dahraix.

Couhsuenq giz bouxsien youq de gyaeundei baenzmaz bae, roeggap gag youq gizde, goj rox mbwqlinlin, de coj dauqma.

Sou ngoenzngoenz caemh youq caez guhcaemz, couhsuenq giz bouxsien gyaeundei baenzmaz bae, goj ndei mbouj gvaq gizneix, de coj dauqma go.

Gaej daejnga’nga lo, roeggap hau ha.

Ninz vei! Ninz vei! Roeggap hau ha, mbangjbaez haetcog, mwngz baez hai da, duz roeggap mong couh youq henzgyawj mwngz lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）