Duzdouq、duzma caeuq duz- mui dwg baengzyoux ndei, gyoengqde caez bae lijyouz.

Gyoengqde byaij daengz henz dah iq ndeu, raen ga giuzfaexdog ndeu. Sam boux doengzdoih gvaq giuz. Baez mbouj re le, duzdouq doek raemx lo. “Aiya, gouqmingh, gouqmingh, duzma、duzmui, vaiq daeuj gouq gou.” Duzdouq doq cak doq hemq. Duzma mbwqmbwt naeuz: “Gou langh roengz raemx gouq mwngz, buh gou couh dumz liux lo, dumz le couh deng dwgliengz, mwngz ceiq ndei heuh duzmui ba.” Siengj mbouj daengz duzmui hix mbouj gaenj mbouj vueng naeuz：“Gou mbouj rox youzraemx, roengzbae gouq mwngz gou lau dai, mwngz swhgeij hwnjdaeuj ba, dou youq henz hamq caj mwngz.” Duzdouq buek- mingh cak, doeklaeng gaem dawz diuz gaeu gouqmingh ndeu, ndaej hwnj hamq lo. Duzma caeuq duzdmui byaij coh naj de bae naeuz：“Duzdouq mwngz baenzlawz yiengh la？Mbouj miz saeh ba?” Duzdouq doiq song boux baengz- youx neix lumj yawj mbouj raen nei, caemsim naeuz：“Raeuz byaij vaiq di bw, mbwn yaek laep lo.” Gangj sat, gyoengqde youh byaij roen lo.

Cingq byaij dwk byaij dwk, sawqmwh doek fwn hung lo, duzma ganjgip daj ndaw daeh dawz ok aen liengj ndeu, caeuq duzmui caez gang liengj, caemhcaiq doiq duzdouq naeuz：“Duzdouq, liengj gou iq lai, mbouj ndaej gang sam boux vunz, rwz mwngz youh hung youh raez, mwngz beng rwz daeuj dangj fwn ba.”Duzdouq mbouj guhsing, dawz daehsaw dangj coq dingjgyaeuj, mbouj oksing deuz lo. Duzma caeuq duzmui roxnyinh geizheih, simsiengj：“Duzdouq vihmaz gag byaij deuz ne？”

Siuj baengzyoux, mwngz rox duzdouq vihmaz gag byaij deuz lwi？

（bouxlauxsae son’gyauq：Vangz Gveiyangh/黄桂香）