Duenh gonq, lauxsae lwnh naeuz:“Hagdangz yaek cujciz nienzgaep daemq doxdax gangj gojgaeq cojcienz, caezgya aeu doxcanj bauqmingz bw!”Gou baez dingq, da lai rongh lo, aenvih gou gyaez gangj gojgaeq; danhseih lwgda gou youh laep dauq gig vaiq, aenvih gou ngeix daengz doxdax gangj gojgaeq dwg gienh saeh daegbied mbouj ngaih ndeu, gou boux vunz sij saw mbouj cingq、hwnjdangz ngeix sam ngeix seiq neix, gangj gojgaeq ndaej ndei lwi?

Dauq daengz ranz, daxmeh dingq le gij naemjfap gou, rub aen’gyaeuj iq gou naeuz:“Mwngz baez gonq youq Suhcouh Si gangj gojgaeq doxdax ndawde ndaejciengj gvaq bw, gou genyi mwngz gaemdawz gihvei bae sawq mbat ndeu!”Gou baez ngeix le raen hix doiq, ndaw hagdangz doxdax wnggai beij daengx si doxdax lai ngaih, neix gou couh caeuq lauxsae bauq- mingz lo. Danhseih gou ndaw sim vanzlij miz di mbouj caemdingh, cungj naemj: Gou dauqdaej gangj ndaej ndei mbouj ndei?

Gou senj aen gojgaeq dwg《Nyaenma Baengh Vifung Duzguk》, gou moix ngoenz gangj de baez dem baez. Lienh gangj seizhaenx, gou raen gij mbouj ndei swhgeij lo, beijgangj: Ngamq heij gangj daengz gij vah duzguk caeuq nyaenma, gij sing gou doxlumj caez, neix bouxdingq baenzlawz rox dwg duzlawz gangjvah ne? Daengzlaeng gou aeu gij sing bozbod haenx yienj duzguk, aeu sing hepsaeq yienj nyaenma, yienghneix guh couh lai sengdoengh lo! Mizseiz, gij ningdoengh gou unqnemnem nei, mbouj gaenj saek di. Gou doq lienh, doq gaij, yawj ndaw sibinz swhgeij yied gangj yied ndei, gou hix menh- menh miz goekdaej miz saenqsim lo.

Daengz ngoenz doxdax lo, gou ndawsim lumj miz cibhaj aen doengj- venj—caet hwnj bet roengz nei. Youq gwnz daiz gangj seizhaenx, gou doq gangj doq caeg yawj bouxdingq baihlaj miz maz fanjwngq, gyoengqde mizseiz ngiengx gyaeuj riu, mizseiz aj bak riu. Gou ndawsim mbouj daih caemhdingh, aenvih gou ndawsim hix riu, danhseih gou youq gwnz daiz mbouj ndaej riu bw!

Gangj sat roengz daiz daeuj, gou roxnyinh gou caen ak, danhseih hix mbouj rox ndaej geijlai mingz. Fat ciengj lo! Siengj mbouj daengz gou gingqyienz ndaej ngeihdaengjciengj! Va! Gou seizneix maqmuengh doxdax gangj gojgaeq dangqmaz bae, aenvih gou simsaenq baez laeng gou itdingh ndaej daih’it mingz.

(Sau Yisungh/邵逸松)