Daxmeh dwg ranz dou bouxsughangz guh gijgwn ndei, gij dinfwngz dajcawj de hawj gou gingqboiq dangqmaz, neix le gou couh siengj baiq de guh lauxsae, caeuq de hag gij dinfwngz guh duzgungq gyaeujho mienz, gou ceiq maij gwn gijneix lo.

Seiz couhmoz, gou caeuq daxmeh guhdoih daengz hawciengz cawx duzgungqlungz, cij raen gyoengqde vad“cungqcax”swhgeij, yienghsiengq lumj naeuz yaek cak duet cagcug ok nei. “Baenzlawz genj duzgungq ne?”Aen vwndiz neix doiq gou bouxmoq neix daeuj gangj hoj lai. Daxmeh raen gou miz hojnanz, lejsing doiq gou gangj mwngz yaek cawj duzgungq ndeigwn, couh yaek genj aeu doenghgij gungq mizrengz diuqyetyet de. Gou maeuq roengzdaeuj, sijsaeq yawj yaep ndeu, gietdingh daiq doenghgij duzgungq gyaez hoenx、gyaez ning haenx bae liux.

Ndaej daxmeh vixyinx, gou dawz faggeuz okdaeuj, yaek“hai laeng”, danhseih gyamq duzgungq ndongj lai lo, gou mbouj rox baenzlawz guh, najbyak gou menhmenh ok hanh lo. Cieplaeng gou couh raen incoeg lai, gou mbouj re le deng duzgungq hung ndeu nap fwngz gou. Daxmeh raen gou“gvanghyungz deng sieng”lo, couh ciep faggeuz ndaw fwngz gou daeuj laebdaeb“hoenxciengq”. Gou sim caepcat muengh duz- gungq, sim ngeix：Nanzdauh gou hag dinfwngz mbaek daih’it couh deng goenq ma? Daxmeh raen gou sim mbouj fug saw, gangjriu naeuz:“Bouxdajcawj hung gaem goeksieg, aen yinvu dajleix duzgungq couh gyau hawj gou guh la!”Gou baez dingq, gikdoengh le diuq hwnj sam cik sang bae.

Gou lejlej hai meizgicau, ciuq gij fap daxmeh son gou haenx bae guh, coq di youz ndeu gonq, liuxle coq diuzliu, cieplaeng coq duzgungq fan cauj, caiq laeng coq gyaeujho mienz. Mbouj gvaq geij faen cung, gij hom gyaeujho mienz con haeuj ndaw ndaeng daeuj. Gou ndenq duzgungq ndeu hawj daxmeh cimz gonq, daxmeh doq gwn doq haenh:“Mwngz guh duzgungq gyaeujho mienz ndeigwn dahraix!”Gou dingq le ndawsim angq- vauvau, gikdoengh le naeuz:“Cijaeu mwngz siengj gwn, gou ngoenzngoenz guh hawj mwngz gwn!”

（Cwngz Swjliuj/程子柳）