Mwngz riu gijmaz ne? Beixmbauq ha, nuengx veh gijmaz mwngz cungj yawj mbouj rox, mwngz huk lai. Nuengx veh gyanghaemh gwnzmbwn go, doenghgij diemj neix dwg ndaundeiq go, gij miz raemxlangh neix couhdwg dahmbwn go, henz dah dwg aen ranziq go, veh ndaej mbouj lumj ma? Baihde dwg camhdienhraemx go, aen camhdienhraemx henz dah laj bya de mbouj dwg yienghneix ma?

Mwngz riu gijmaz ne? Beixmbauq ha, mwngz naeuz dahmbwn mbouj miz raemx ma? Mwngz huk lai. Mbouj miz raemx guhlawz heuhguh dah ne? Mwngz goj caengz ndaej bae gwnzmbwn yawj gvaq, guhlawz rox dahmbwn mbouj miz raemx ne? Langhnaeuz ndaw dahmbwn mbouj miz raemx, vihmaz gwnzmbwn mbangjseiz couh doekfwn hung baenzneix ne?

Mwngz riu gijmaz ne? Beixmbauq ha, mwngz naeuz gwnzmbwn mbouj miz camhdienhraemx ma? Mwngz huk lai. Gwnzmbwn mbouj miz camhdienhraemx, guhlawz miz byajmig ne? Nanzdauh gij dienh byajmig de dwg daj camhdienhraemx gwnznamh soengq hwnjbae ma? Couhsuenq dwg yienghneix, banneix gwnzmbwn lij caengz miz camhdienhraemx, hoeng daengzcog coj miz dahraix. Boh mbouj dwg naeuz, gaenq miz vunz naengh ruzmbin hwnj gwnzmbwn bae gvaq ma? Caj nuengx maj laux le, nuengx goj hwnj gwnzmbwn bae, bae laeb aen camhdienhraemx ndeu, laeb youq bangxhenz dahmbwn. Daengz seizde, gij camhdienhraemx nuengx laeb haenx diemj rongh lailai aen daengdienh, ndaundeiq gwnzmbwn couh engq lai lo. Beixmbauq ha, mwngz goj baen mbouj cingcuj aen ndaundeiq lawz dwg aen ndaundeiq caen, aen ndaundeiq lawz dwg aen daengdienh bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）