Miz ngoenz ndeu, lingzmeh heuh duzlingz iq okbae ra di gijgwn ma ranz. Duzlingz iq dingq le, couh okbae lo.

Duzlingz iq yawj doeng yawj sae, yawjyawj gizlawz miz gijgwn. Sawqmwh de yawjraen gaiq dieg sae’gva ndeu. Ndaw dieg neix sae’gva youh hung youh nduen. Duzlingz iq gig angq, buet bae genj aen sae- gva ceiq hung ndeu, got sae’gva maranz. Doq byaij doq siuq rumz, sim’angq raixcaix.

Cingq byaij dwk byaij dwk, gyaq cihuq ndeu daj henz ndang duzlingz iq ginggvaq. Sawqmwh cihuq baez ngengq, “Ba！”sing ndeu, aen lauxbaeg youh hung youh hau ndeu daj gwnz ci doek roengzdaeuj. Duzlingz iq yawjraen le, sim siengj：“Lauxbaeg youh byot youh diemz, gig ndeigwn.” Ndigah duzlingz iq dawz sae’gva soengq hawj duz- mui, gwed lauxbaeg doq ciengqgo doq byaij coh ranz.

Cingq byaij dwk byaij dwk, duzlingz iq raen go faexbingzgoj ndeu, gwnz faex giet rim gij makbingzgoj youh hung youh hoengz haenx. Duzlingz iq simsiengj：“Danghnaeuz doek aen makbingzgoj ndeu roengzdaeuj couh ndei lai ha!”“Dungh!” Aen mak- bingzgoj ndeu doek roengz- daeuj, cingq doek deng gyaeuj duzlingz. “Ngoenz- neix seizheiq gou ndei lai lo. Gou aeu dawz aen makbingzgoj neix guh baenz bingzgoj bingjbai，caeuq daxmeh caez faenyiengj.” Yienghneix de dawz laux- baeg soengq hawj duzdouq, gip hwnj makbingzgoj, saetdiuq byaij coh ranz.

Cingq byaij dwk byaij dwk, duzlingz iq yawjraen gwnz namh sanq rim lwgraz. Duzlingz iq sim siengj：“Dawz gij lwgraz neix ndaem coq ndaw reih, soundaej haujlai lwgraz, aeu lwgraz caq youz roxnaeuz guh bingjlwgraz, gig hom.” Yienghneix duzlingz iq couh gwn le makbingzgoj, hainduj gip lwgraz. Gip le haujlai nanz, gip ndaej daeh- iq ndeu, duzlingz iq baeg ndaej hwet in ndang naiq. Hoeng, duzlingz iq ndaw sim angqvauvau.

Banhaemh, duzlingz iq ma daengz ranz, dawz gij saeh ngoenz neix lwnh hawj daxmeh nyi. Lingzmeh riu dwk gangj：“Gip lwgraz vut sae’gva, couhdwg gangj mwngz lo. Hoeng, doeklaeng raeuz yaek sou ndaej engq lai lwgraz. Aen cawjeiq neix mbouj loek.” Gangj sat, lingzmeh yiengq duzlingz iq daengj hwnj fwngzmeh. Duzlingz iq ndaej mehlingz haenh, haisim dwk riu lo.

（bouxlauxsae son’gyauq：Vangz Gveiyangh/黄桂香）