Bungz cungj ngoenzciet neix, lwgnyez dou ceiq angqyangz lo, ndaej ngaenzlingzyungh, ndaej daenj buhvaq moq, youq ndaw miuh ndawrog buet bae buet dauq, vuenheij dangqmaz, ndigah gou baez yawjraen gij yiemh- mbwnj gwnz dingjmiuh, couh geiq hwnj gij cingzgingj mwh hoh duzyou ngoenzseng, mbouj rox mbouj nyinh couh angqvau hwnjdaeuj lo.

Hoeng ngoenzneix mbouj dox- doengz, miuh baihnaj caemrwgrwg, aen ngaeuz ndeu hix mbouj miz, cij miz gyoengq roeglaej youq gwnz diegnywj mbin bae mbin dauq, song aen daengloengz hung lajroq, deng rumz bongj ndaej bibi buengqbuengq, doumiuh haep dingz he, ndaw ding laepngaungau, heuh gou boux vunz ndeu gag haeujbae caen miz di lau bw.

Gou rox Aulungzgveiz youq miuh baihlaeng, gvaengx gvaq aenmiuh, gou couh doq buetregreg doq hemq:

“Aulungzgveiz! Aulungz gveiz!”

“Hai! Gou youq gizneix, Ah- byauh!”

De heuh aen coh gou, gij sing daj gwnz gofaexnganx laeng miuh cienz daeuj.

“Mwngz youq gizneix guh maz?”

Gou buet coh laj gofaexnganx, sing hung cam.

“Mwngz daeuj yawjyawj!”

Mwh gou buet daengz lajde seiz, deng gij doxgaiq dangqnaj hwk linj lo.

Youq gwnz nga vang, venj miz duz ngwz miz sam seiq cik raez, hoz de deng cagndaij goenjcug le venj youq gwnz gofaex, daengx ndang mbouj dingz niuj bae niuj dauq, siengj dawz diuz rieng de geuj ngafaex, hoeng baenzlawz geuj hix geuj mbouj ndaej, yawj hwnjdaeuj caen hawj vunz roxnyinh baihlaeng caeprikrik.

Gou ndwn youq giz liz miz 10 lai cik, mbouj gamj byaij gyawj, saek- laeuq cagndaij de goenq, gou ndaej doq baenq gyaeuj couh buetdeuz.

“Mwngz yawj gou bok naeng de ba.” Aulungzgveiz riuhehe dwk iet fwngz gaem diuz rieng duzngwz, lumj dawz aen dwngx nei doiq gou gangj:“Lwgsai, baenzneix mbeiiq?”

Gou raen diuz rieng duz ngwz gaenq deng de gaem youq ndaw fwngz lo, youh deng gij vah de gik, gou yaek aeunaj, couh byaij gyawj le geij yamq, cang guh yiengh mbouj lau cam de:

“Daj gyawz gaemh daeuj ne?”

(caengz sat)