Ciuh vunz raeuz raezrangrang, nanz mbouj nanz aiq miz gienh saeh ndeu hawj raeuz raen saetnaj, miz di saeh ndeu gvaq duenh seizgan couh lumz lo, hoeng, miz di saeh yaek lumz cungj lumz mbouj ndaej.

Ndaejgeiq miz bi ndeu, gou bae daengz Gveilinz Si guhhong, caeuq boux vunz diegrog he caez hwnjban, de dwg Cauzsenjcuz, rox gangj Vahcauzsenj, seizde song boux dou cungj itheij gwn haeux, itheij gangjgoj、guh’angq, youh caez youq aen rug he, mbouj miz maz vah mbouj gangj.

Miz ngoenz ndeu, guhhong daengz gij seizgan yietnaiq lo, song boux dou youh itheij naengh roengzdaeuj gangjgoj, hainduj cungj dwg gangj di saeh gvendaengz guhhong, caiq gangj daengz dieg gyawz gangj vah baenzlawz baenzlawz. Doeklaeng de cam gou:“Daegnuengx, dingqgangj sou Bouxcuengh miz Sawcuengh, dwg lwi?”

Dingq de yienghneix cam, gou doq ngaekgyaeuj dap naeuz:“Dwg ha.”

De youh cam:“Yienghneix mwngz itdingh rox sij Sawcuengh lo?” Baezneix gou naj nding rwz hoengz lo, dingz yaep ndeu gou ngauzngauz gyaeuj dap naeuz:“Gou mbouj rox sij.” Gou gangj sat, raen de veq naj gvaq henz bae, aen ndaeng “hwng” sing ndeu, gag gangj gag naeuz:“Dwg Bouxcuengh, mbouj rox sij saw bonjfaenh, caen dwgriu lai lo.” Dingq coenz vah de le, gou mbouj rox baenzlawz gangj lo, aen naj engqgya fat nding fat ndat, roxnyinh raen saetnaj raixcaix. De naeuz hix mbouj loeng, dwg Bouxcuengh, hoeng mbouj rox sij Sawcuengh, suenq maz Bouxcuengh dem.

Seizhaenx gou couh naemj, danghnaeuz gyawz miz hagdangz son Sawcuengh, gou itdingh aeu bae hag. Caj gou hag rox Sawcuengh le, itdingh aeu Sawcuengh bae geiq fwen mbanjranz gou. Danghnaeuz miz saek ngoenz de caiq raen gou, gou couh ndaej miznaj doiq de naeuz:“Seizneix gou mboujdan rox sij Sawcuengh, rox doeg Sawcuengh, lij ndaej aeu Sawcuengh daeuj sij fwen dem.”

Gaenq gvaqbae haujlai bi lo, seizneix gou hix caen hag rox Sawcuengh lo, gienh saeh neix youq ndawsim gou cungj mbouj lumz gvaq, cungj dwg roxnyinh gig saetnaj.