Sanglinz dwg mbanjranz gou, gou youq gizneix youq le 18 bi, doiq gizneix sug dangqmaz, doeklaeng, gou lizgyae mbanjranz bae diegrog doegsaw, moix mbat dauqma Sanglinz, cungj hawj gou ngeix hwnj dahsau ndawsim gou.

2017 nienz 6 nyied, gou ngamq ndaej 18 bi, caemhcaiq hix daj gauhcungh bizyez lo. Cuengqgyaj le, gou roxnyinh mbwq dangqmaz, couh siengj okdou bae guhcaemz baez ndeu, cingqngamj ngoenzde dwg ngoenzseng boux baengzyoux ndeu, ranz gou liz ranz de mbouj suenq gyae, naengh mohdozceh 10 lai faen cung couh daengz lo. De mbouj cingj geijlai vunz daeuj hoh ngoenzseng, ngamq dahyoux de、song boux lwgsai、gou caeuq dahsau ndeu gungh 5 boux vunz ndwi. Bouxwnq gou ngeix mbouj cingcuj lo, cij lunz mbouj ndaej dah sau neix.

De mbouj suenq sang, naj de bizbwdbwg, ndaw hau lij miz di hoengz, dwggyaez dangqmaz, lwgda de ronghdikdik, riu hwnjdaeuj lumj dujva gyaeundei ndeu. Gou gag ngeix: Dahsau neix baenzneix lengj, caen lumj dahsien ha! Gou yawj maez lo. Dangauh ndaw fwngz doek youq gwnznamh hix mbouj rox, baengzyoux heuh gou hix mbouj ndaejnyi. Gvaq yaep ndeu, de raen gou itcig yawj de, couh coh gou byaij gvaqdaeuj, ndwn youq baihnaj gou, dah sau neix liz gou baenzneix gyawj, sim gou diuqbubbub naj hix hoengz lo, de iet fwngz okdaeuj, riu dwk doiq gou gangj:“Mwngz ndei, gou heuhguh Siujcinh, raeuz guh baengzyoux ba.” Couh yienghneix, gou roxnaj de lo, caeuq de roxnaj ndwen ndeu, gou liujgaij daengz, de hix dwg bizneix gauhcungh bizyez, caeuq gou doxdoengz, hix dwg 18 bi. De lwnh gou naeuz, aen loqsiengj de dwg bae Gvangjsih Swhfan Dayoz doegsaw, danghnaeuz ndaej bae daengz gizhaenx doegsaw, couh muenxcuk lo.

Doeklaeng, gou ciengzseiz bae ra de, iu de bae guhcaemz、yawj denyingj、gwn haeux, gou ngoenz beij ngoenz maij de. Miz ngoenz ndeu, gou caeuq de bae guhcaemz, byaij daengz gij dieg vunz noix ndeu. Seizhaenx rumz ci daeuj, liengzsisi, gou gaem fwngz de doiq de naeuz:“Liengz lwi?” “Miz mwngz youq henz ndang gou mbouj roxnyinh liengz.” “Guh dahyoux gou ndaej lwi?” Gou cam. De gangj:“Caj mwngz coenz vah neix gou dwgrengz lai lo.”

De baenz dahyoux gou lo, saedceij caeuq de caez youq hawj gou vaiqvued fouzbeij. Hoeng, byawz liuh ndaej daengz, miz ngoenz ndeu, de doiq gou gangj:“Gou gauj ndaej mbouj ndei, aeu ma hagdangz caiq doeg bi ndeu, raeuz lij dwg faenhai ba!” De yaek dauqbae nyinhcaen doegsaw caiq gauhgauj, hoeng gou yaek bae hwnj dayoz, de baenzneix gangj, gou hix mbouj rox gangj maz lo.

Yienznaeuz caeuq de caez youq mbouj nanz, hoeng, doeklaeng gou baenzlawz hix lumz mbouj ndaej de, itcig daengz doeg dayoz ngeih nienzgaep le, gou lij ciengzseiz ngeix hwnj de, ciengzseiz loq raen de, danghnaeuz seizgan ndaej doiq dauq, gou itdingh gaem maenh fwngz de.