O! Najdah gizgyae, miz moengj ruz hunghung iqiq caemrwg youz bae youz dauq. Lumj mbawfaex caeuq haizdaz fouzfetfet. Lumj ning mbouj ning, yaek daengx mbouj daengx. Caez yawj ndaej raen, cix dog mbouj ndaej. Gwq yawj gwq yawj, mwngz couh miz gij siengjfap yaek gungj hwet gop hwnj saek aen song aen ruz daeuj guhcaemz, hoeng mwngz ciengxlwenx lumh mbouj ndaej.

Miuhsaenzvangz mbouj suenq hung, hoeng caux ndaej lengj, gou ceiq maij gwnz mbaek gij saeurin gaek miz duzlungz, youq henz lij miz song duz saeceijrin dawz dwk, ndaw bak songde lij hamz miz song naed giuzrin. Moix bi gizneix cungj miz duenh seizgan ndeu ceiq nauhyied, daj liggaeuq ndwencieng coit itcig daengz ndwenngeih co- ngeih, ndaw miuh buiz miz haujlai duzyou, gyoengq vunzmbanj ciengz- seiz swngzgei daeuj neix gyonjcomz guhcaemz, ndaw miuh hoenzyieng gvaengxgvax, vunz lai vunz daih, miuh baihnaj dap daizheiq, daj banringzgvaq couh hainduj ciengq heiq, itcig ciengq daengz gyanghwnz bae.(caengz sat)