Gou dwg vunz Nanzningz Si Hinghningz Gih Gunhlunz Cin. Gunhlunz Cin seizgonq heuhguh Giujdangz Gih、Giujdangz Gunghse, bi 1994 cij heuhguh Gunhlunz Cin.

Gou daj bi 1957 doegsaw gauhsiuj bizyez, mbouj ndaej bae gauj cuhcungh, aenvih ranz gou beixnuengx lai, bohmeh mbouj miz ngaenz soengq bae doegsaw, gou lij iqet couh deng youq ranz guhhong, couh gaen vunz bae guh suijli, youq Vujdangz Sihvwnzgang guhhong.

Seizhaenx Giujdangz Gunghse youq dangdieg banh aen “gaendoeg” cuhcungh ban Vujdangz ndeu, hawj gij vunz lij iq daeuj guhhong haenx doq doegsaw doq guh senhconz. Suijli caengz guh caez, youq Yunghningz Yen banh miz aen ban Sawcuengh, moix aen cin cungj miz vunz bae doeg. Giujdangz Cin miz song boux vunz bae, gou hix miz faenh ndaej bae. Ban Sawcuengh ngamq doeg sam ndwen couh sat lo, seizgan dwg bi 1961 ndwen 7 daengz ndwen 10, aenvih gij cingzcik gou ndei, ndaej louz roengzdaeuj doeg Sawcuengh cuh- cungh, youz song aen ban gyoeb baenz aen ban ndeu. Aen ban cuhcungh banh daengz bi daihngeih cib nyied, ndaej saenq Sawcuengh bizyez, ban Sawcuengh banh daengz daihsam aen yozgiz, ndaej fat mbaw sawcingq Sawcuengh bizyez ndeu. Gou ndaej- geiq, seizhaenx boux yaucangj dwg Lij Dungzginj, boux lauxsae Sawcuengh dwg Lij Yenzbiz.

Youq 20 sigij 60 nienzdaih seizhaenx, bae yienhsingz banhsaeh、haihoih caeuq doegsaw cungj dwg- rengz lai, aenvih mbouj miz ci dap. Gou bae yienhsingz doeg Sawcuengh, dwg daj Giujdangz Gunghse byaij bae daengz Vujdangz Gunghse (seizneix heuhguh Vujdangz Cin) ninz haemh ndeu, ngoenz daihngeih daj Vujdangz byaij gvaq ndoi gvaq lueg, cij bae daengz dieg yienhsingz heuhguh Buzmyau, caiq bae daengz aen hag- dangz Sawcuengh, gaenq mbwn laep ndaej gwn ngaizhaemh lo.

Aen ban Sawcuengh cuhcungh doeg daengz bizyez le, ndaw yienh cujciz gunghcozdui roengz lajmbanj bae guh hong saujmangz, bae lajmbanj son vunz doeg Sawcuengh singmeh, ngoenzhaw daengz gwnz haw son vunzlai doeg Sawcuengh. Hoeng, aen gunghcozdui neix ngamq guhhong mbouj nanz, seizhaenx guekgya raeuz deng Suhlenz bik caiq, youh bungz daengz miz aen yen guhgyaj bau mauh moux naz sou ndaej 13 fanh gaen haeux, haih daengz vunzlai mbouj miz haeux gwn deng dungxiek, yienghneix hong gunghcozdui guh mbouj roengz- bae, doeklaeng couh sanq lo, gij hong son Sawcuengh hix mbouj ndaej guh roengzbae lo.

Seizgan gvaq daengz bi 1989 le, gou cij youq Nanzningz Si Singhhuz Lu ndaej raen Gvangjsih Minzcuz Bau banj Sawcuengh. Haujlai nanz seizgan mbouj ndaej doeg Sawcuengh lo, gou dawz bauqceij Sawcuengh baema doeg, miz mbangj vunz raen le cungj gangj gou doeg Sawcuengh mbouj miz yungh, gou cungj mbouj leixlangh, ciuqyiengh doq guhhong doq youh doeg youh sij Sawcuengh.

Youh daengz bi 2018 ndwen 12, gou ndaej rox dieg banhgoeng Gvangjsih Minzcuz Bause youq Nanzningz Si Gveicunh Lu, couh heuh lan gou daiq gou bae daengz bause, ndaej raennaj bause bouxdaeuz caeuq bouxbien, gyoengqde dingqnaeuz gou geijcib bi gonq hag gvaq Sawcuengh, daengz seizneix lij mizsim hag Sawcuengh, cungj haenh gou mbouj dingz, lij heuh gou aeu sij di faenzcieng Sawcuengh hawj bause. Daj bi 2019 ndwencieng hwnj, bause lij dinghgeiz geiq bauqceij Sawcuengh hawj gou. Gou youh ndaej doeg bauqceij Sawcuengh lo. Hoeng, bauqceij Sawcuengh seizneix dwg Sawcuengh moq, caeuq gou geijcib bi gonq hag gij Sawcuengh miz di mbouj doxdoengz, gou doeg bauqceij miz di dwgrengz.

Gou doq doeg doq hag, doeg lai le couh hag rox Sawcuengh moq lo. Daj bi 2019 ndwencieng hwnj, gek 7 ngoenz gou sou ndaej bauqceij moq le cungj doeg, hoeng youh miz vunz gangj gou lo, naeuz:“Mwngz lauxgeq doeg gij Sawcuengh neix mbouj miz yungh!” Gou cungj mbouj leixlangh gij vunz neix. Gou mboujdan doeg Sawcuengh, bi 2019 ndwen 7, gou lij bae bauqmingz camgya Sawcuengh gaujsi, doeklaeng gou gauj ndaej cingzcik habgek, ndaej Gvangjsih Bouxcuengh Swcigih Minzcunghveij fat mbaw cingqsaw dem.

Gou hag Sawcuengh baenz seiqvunz, gou miz geij coenz vah ndawsim aeu gangj: Docih gung- canjdangj, raeuz Bouxcuengh cij miz saw raeuz. Bouxcuengh miz Saw- cuengh, vwnzva raeuz ndaej cienz- swnj, Mbanjcuengh raeuz lij ngoenz beij ngoenz gyaeundei!