Daiq ngeix le yaep he, ngaek- ngaek gyaeuj.

“Caj banringzgvaq caiq soengq bae, hawj meh mwngz ra song geu buhvaq gaeuq hawj de dem, baenz- baenz buhvaq daxboh mwngz miz haujlai.”

“Gou soengq bae?”

“Baenzlawz? Mwngz mbouj nyienh?”

“Nyienh, nyienh!” Gou sim’angq dap naeuz, lumj guh gij saeh hawj vunz aencingz, byawz mbouj nyienh guh? Gangjnaeuz gou roxnyinh Aulungzgveiz mbouj lumj gyoengq vunzhung yienghde rwix, caeuq de gangjriu guhcaemz, hix gig miz yinxdaeuz ne!

Daengz banhaemh, gou riuj aen lamz he, ndawde cuengq miz song geu buhvaq gaeuq daxboh gou caeuq gaiq gau he, daengz miuhsaenzvangz bae ra Aulungzgveiz.

Daihseiq Baihnaj Baih- laeng Moh Ciuhgonq

Daj ranz gou daengz miuh- saenzvangz, aeu ndonj gvaq benq ndoengfaex he, ngomx gvaq goengq bya iq he, miuhsaenzvangz couh youq ndaw gemh iq laeng bya gyawj dah gizde.

Daiq ca mbouj geijlai gek geij ngoenz, couh byaijsaensaen daengz aen miuh haenx bae.

Faen mbouj ok dwg buiz sienbya、dojdeih roxnaeuz yahmeh (hix couhdwg Mahcoj Niengzniengz), cij dingqgangj moix baez bungz aenruz yaek okbae, yieng lab gizneix couh daegbied hoengh. Daiq dwg swnh- bienh daeuj, hoeng hix gig goenggingq caemhcaiq caensim. De baez haeuj ndaw miuh, couh gig suglienh dwk lumh ok gij yieng bouxwnq lai daiq daeuj ce youq gwnz daiz haenx, gaenhdep gij lab gaenq dawz haenx aeu feiz dwk yieng ndaw fwngz caez, doeklaeng couh laeb youq ndaw lozyieng、congh ciengz、geh gwnznamh ndawde, naengbak baez ning baez ning, mbouj rox nam maz, lumj doegging nei.

Youq ndaw da lwgnyez, gij sien caeuq fangz mbouj miz maz mbouj doxdoengz. Gou raen daengz neix, daengx ndang hwnj naenggaeq, saenz le mbat he, couh siengj oknyouh lo, doq heuh daiq vaiqdi okdaeuj. Daiq hix caen dwg, dan daengq coenz “gaej doiq gij rumz oknyouh”, couh gag ai dou miuh, haep fouq da gaenq raiz hwnj, dingq gij sing raemxdah fanfoed lumj sing roq rinranx roq gyong nei daj gyae’gyawj cienz daeuj. Daiq lumjnaeuz miz di luqlawq, dwg mbouj dwg de baeg lai lo? Baenzneix baez ngeix, gou