Gou deng duzrwi ndat le, fajnaj foeg baenz gyaeujmou bae, lwgda cungj bienq iq lo, ninz nanznanz cij ninz ndaej ndaek bw.

“Duzrwi! Boh ha, duzrwi daeuj moq lo!” Gou fangzhwnz deng doek- saet ndiusingj.

“Ninz ha, gyanghwnz duzrwi mbouj okdaeuj go.”

“Gou lau duzrwi! Aiyo, in lai lo. Boh ha, gou in lai!” Gou in lai youh daej moq lo.

“Gaej daej lai, boh lwnh aen gojgaeq ndeu hawj mwngz dingq, baenz lwi?”

Gou gyaez dingq gojgaeq, yienghneix couh mbouj daej lo.

“Lwnh aen gojgaeq duzrwi bw. mbouj luenh ndat vunz ne.”

“Nyaenx de vihmaz ndat gou ne?”

“De laihnaeuz mwngz yaek gyongz aenrongz de go. Mwngz dwg mbouj dwg aeu ngafaex fad duzdaek ne?”

“Gou cungj yawj mbouj raen rongzrwi ne.”

“Wgo! Baezneix dwg duzrwi guh loeng lo.” Boh laebdaeb naeuz dem. “Duzrwi deng dwk cij ndat vunz, gyoengqde yaek hendawz ndei aenrongz gyoengqde, hendawz ndei dangzrwi. De yienghneix guh dwg vih gyoengq doengzdoih de go.”

“Nyaenx goj dwg vih swhgeij lwi?”

“Nauq bw, duzrwi ndat vunz de mbouj vih swhgeij ne. Duzrwi ndat vunz le, couh deng dai bae. De miz saenj laez ndeu ndwi, de aeu laez hoh ndang, baez ndat vunz le, saenj laez de couh mbouj miz lo. Duzrwi mbouj miz laez le, couh deng dai bae. Hoeng, mbouj miz saek duz lau dai bw.”

“Duzrwi mbeidaeuz raixcaix! Ngoenzneix duzrwi ndat gou haenx, goj deng dai bae ma?”

“Wgo! Dai gvaq!”

“Doeknaiq lai! Ai, cungj gvaiq gou.” Yienghneix gou couh mbouj lau duzrwi saek di lo.

“Fajnaj mwngz lij in lwi?”

“Mbouj in baenzlai lo……” Gou vubvubvebveb gag naeuz, gvaq yaep couh ninz ndaek lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）

Duzrwi