Daxmeh gou yienghsiengq itbuen, hoeng de dwg lauxsae saedceij gou, son gou rox haujlai dauhleix guhvunz.

Daxmeh gou gig gaenxguh. De moix ngoenz deng guh haujlai hongranz, lij aeu ciuqgoq gou、dahnuengx caeuq daxbuz. Dah- nuengx gig cabheiq, hawj daxmeh yousim lailai. Miz baez ndeu, dahnuengx veh dozveh, veh dwk veh dwk, dahnuengx couh youq gwnz daiz luenh veh, dawz gwnz daiz veh baenz najraiz. Daxmeh yawjraen le, heuh dahnuengx gaej veh lai. Doeklaeng daxmeh deng mad gwnz daiz byongh ngoenz bae, cij mad ndaej seuq. Daxmeh baeg lai lo, hoeng de mbouj dingz roengzdaeuj yietnaiq, youh guh hongranz. Daxmeh lumj duzcwz laux, vih ndaw ranz nyaengq baenz ngoenz.

Daxmeh hix gig simndei，gvansim ciuqgoq bouxlaux. Seizhah miz ngoenz ndeu banhaemh, daxbuz sawqmwh baenzbingh, daxboh mbouj youq ranz, baenzlawz guh ne？Daxmeh mbouj ngeix saekdi, sikhaek ciq gyaq cisamloek, doz daxbuz bae yihyen yawjbingh. Daxbuz youq yihyen seiz, daxmeh cungj dwg ndaw ranz caeuq yihyen song baih buet baedauq, mboujdan ciuqgoq gou caeuq dahnuengx, lij aeu ciuqgoq daxbuz, hoeng de coengzlaiz mbouj gyangz saek sing. Nanzgvaiq daxbuz raen vunz cungj haenh, daxmeh gou dwg boux bawx ndei ndeu.

Daxmeh lij son gou rox guh- vunz aeu lauxsaed, mbouj ndaej simdam. Miz baez ndeu, gou youq bakdou hagdangz gip ndaej aen daehngaenz ndeu. Cuengqhag le, gou angqfwngfwng dawz daehngaenz ma ranz, doiq daxmeh gangj：“Daxmeh, gou youq bakdou hag- dangz gip ndaej aen daehngaenz ndeu.”Daxmeh dingqnyi, nyinhcaen dwk gangj：“Mwngz youq bakdou hagdangz gip ndaej daehngaenz, wngdang gyau hawj hagdangz ciulingx, roxnaeuz deq bouxcawj daehngaenz daeuj lingx. Mwngz dawz daehngaenz ma ranz, bouxcawj ngaenzbau gig simgip. Mwngz vaiq di dawz daehngaenz gyau hawj hagdangz, hawj lauxsae roxnaeuz bohranz hagseng lingx.”Gou dingqnyi vah daxmeh, sikhaek dawz daehngaenz gyau hawj hagdangz.

Daxmeh gou couhdwg yiengh- neix guh, yungh vah caeuq hengz- doengh de son’gyauq gou, yingj- yangj gou, vixyinx gou, hawj gou gengangh majhung. Daxmeh gou caen dwg boux daxmeh ndei ndeu.

（bouxlauxsae son’gyauq：Vangz Gveiyangh/黄桂香）