Naemjnaemj, fag cik ndeu baenzngoenz deng gyaeng youq ndaw hab vwnzgi, ndaw sim miz geijlai aen loqsiengj ne? Lajneix raeuz dingq de gag lwnh.

Aen loqsiengj daih’it, couh- dwg laeglemx ndonj ok gyausiz. Rox gou aeu guh gijmaz lwi? Gou aeu bae ndaw suenmak, bang makbwz- yanghgoj dingj hwet, lij aeu bang gwnz gomak gaj duz nonhaih, yienghneix gou couh miz haujlai baengzyoux lo. Haha, geijlai ndei saj!Geijlai sim’angq!

Aen loqsiengj daih’ngeih, couh- dwg caegcaeg buet haeuj ndaw suen- byaek bae. Rox gou aeu guh gijmaz lwi? Gou aeu youq ndaw mbaw byaekheu maj ok duhrangz gungj- ngetnget, roxnaeuz cang guh baenz aen lwgbieng raezrangrang ndeu. Aen vanjvei diuqfoux ndaw suen byaek couh yaek heijguh lo! Haha, geijlai ndei saj! Geijlai sim’angq!

Aen loqsiengj daih’sam, couh- dwg riengjret diuq haeuj ndaw aen daemzbya bae. Rox gou aeu guh gijmaz lwi? Gou aeu vih gij gyaeq bya’iq gang liengj liengzswd, youq gwnz aen liengj, lij boemz miz duz- goep loh naengdungx hung hausak- sak, mizmbangj youq gwnz dingj liengj dak daengngoenz, mizmbangj youq laj liengj doxgangj. Haha, geijlai ndei saj!Geijlai sim’angq!

Aen loqsiengj daih’seiq, couh- dwg menhmenh byaij daengz henz rijiq bae. Rox gou aeu guh gijmaz lwi? Gou aeu bang duzroeg iq vad ruz, hawj duzmoed iq gaq giuz. Gwnz giuz miz haujlai doenghduz iq byaij bae byaij dauq. Haha, geijlai ndei saj!Geijlai sim’angq!

Aen loqsiengj daih’haj, couh- dwg yaengyaeng daeuj ndaw ndoengfaex hung. Rox gou aeu guh gijmaz lwi? Gou aeu bang duz noucoengz iq guh faexsaux diuq gyae, hawj duz gaenglwg guh biucieng yaep ndeu. Guh gij ciengjbaiz venq youq gwnz hoz haenx ndongqliklik. Haha, geijlai ndei saj! Geijlai sim’angq!

Bouxlawz hix mbouj rox, fag cik ndeu miz geijlai aen loqsiengj……Couh lumj gij cih ndaem youq gwnz gaujceij, did geijlai ngaz, hai geijlai va, hot geijlai goj lwgnyez.

（bouxlauxsae son’gyauq：Cinz Cinhdonz/覃珍团）