“Neix—— Lwgnyez sou gaej rox ndaej daiq lai.” Daiq mbouj nyienh lwnh hawj gou, de iet fwngz daj gwnz daizcaet dawz doengzien, yut ok ceijdwkfeiz ndenq hawj gou:“Bae bang daiq dwk feiz daeuj.”

Gou coux gvaq ceijdwkfeiz, byaij haeuj ranzcauq, maeuq youq baihnaj bak cauq, dawz faggimz bued gij daeuh ndaw cauq gonq, menhmenh nep ok gaiq danq soiq coemh ndaej nding’yanyan, caiq iet ceijdwkfeiz bae dwk, doeklaeng buet okdaeuj ndenq hawj daiq.

Daiq ngaemgyaeuj cit ien, gou youh daengx mbouj ndaej lo, cienq ndang couh yaek byaijdeuz.

“Bae gyawz?”

“Bae suenbyaek ra meh gou.” Gou swnhbak dap.

“Gou siengj——” Daiq dawz ok gij dungx doengzien, boq gij daeuh ien bae, ngeixloekloek lumj miz saeh naek dimz youq ndawsim.

“Maz?” Gou dingz din baenq gyaeuj muengh coh daiq.

“Mwngz gvaqdaeuj.”

Gou byaij daengz dangqnaj dax- daiq, song lwgfwngz fwngzgvaz de mbouj dingz nap ceijdwkfeiz, caemh- caiq loq nyengq ndang, gig hozraez doiq gou gangj:

“Ahbyauh, raeuz wnggai soengq di doxgaiq hawj Lungz Gveiz.”

“Vihmaz?” Gou mbouj rox, daiq haxbaenh lij naeuz de dwg vunzrwix, heuh gou liz de gyae di, baenzlawz sawqmwh youh yaek soengq doxgaiq hawj de, neix mbouj dwg gonqlaeng doxfanj ha?

“Gou siengj, gou siengj——” Daiq mbwtmbwt mbwjmbwj gangj:“Seizneix raeuz doiq de ndei di, daengzcog, daengzcog …… saek- laeuq……”

“Ndei, ndei!” Gou gig lingz, sikhaek rox gij eiqsei daxdaiq, gyaeuj iq bibi song baez, siengj daengz haxbaenh youq ndaw ranzcauq yawj- raen gwnz cauq miz gaiq gau he:“Daiq, couh soengq gaiq gau he hawj de gwn ba.”(caengz sat)