Bineix bi duznou,

Ndwencieng youq ranz gvaq,

Seizneix miz binghlah,

Daihgya aeu haeujsim.

Daj Vujhan doxdauq,

Aeu bauq hawj baihgwnz,

Fuengzre guh ndaej swnh,

Vunzlai mbouj deng nanh.

Ndang ndaej bingh sinhgvanh,

Aeu vaiqdangq gekliz,

Seizneix baengh gohgi,

Miz bingh mbouj youheiq.

Ndang ndaej bingh sinhgvanh,

Dwg gwn dang duzdoengh,

Duz neix caen rox loengh,

Loeng gwn couh haih vunz.

Sinhgvanh bingh daiq doeg,

Aeu daj goek fuengzre,

Duzdoengh mbouj miz nyeq(noh),

Gwn de rox ndaej bingh.

Danghnaeuz caen ndaej bingh,

Aeu dingq canghyw naeuz,

Gek bae ranzbingh youq,

Mbouj hawj lah vunzlai.

Bingh sinhgvanh feiyenz,

Cienz hawj vunz caen vaiq,

Guhdoih gwn caeuzngaiz,

Vunzlai aiq ndaej bingh.

Gaej luenh youz luenh liuh,

Ciuq baihgwnz cijsi,

Gwn imq yawj densi,

Vih Vujhan dem rengz.

Gak boux youq ndawranz,

Dangq hai cueng doeng rumz,

Baedauq aeu swiq fwngz,

Mwngz caengh noix ndaej bingh.

Okrog aeu cinghsingj,

Itdingh daiq goujcau,

Daengq boux iq boux laux,

Daiq goujcau re bingh.

Mwngz youq dieg gunghgung,

Doxnaeuz gyoengq vunzlai,

Gaej luenh ae luenh haiz,

Myaiz mbouj ndaej luenh biq.

Seizneix bingh caengz gvaq,

Daihgya gaej cuengqsoeng,

Bouxboux siengj doxdoengz,

Roengzsim re binghdoeg.