Haetromh, gou caeuq daxboh bae gwnz bya gip lwgge.

Doiqnaj miz boux bohlungz damengz ndeu byaij gvaqdaeuj, aeu geu faexdwngx ndaw fwngz de diemj ga roen baijnaj mbouj dingz mbouj duenh——ga roeniq gwnz bya ngutngut ngeungeu gumzgumz gamzgamz ne, de byaij numq dangqmaz, dwgrengz lai.

——Boh ha, aeu fouq gingqda mwngz soengq hawj bohlungz neix vei, mwngz youq ndaw ranz lij miz fouq gingqda ndeu dem bw.

Hoeng boh naeuz, bohlungz damengz gvaq, dawz gingqda hix yawj mbouj raen lo.

——Boh ha, lwgda mwngz yawj doxgaiq mbouj singj, dawz gingqda liux cix yawj ndaej singj. Nanzdauh, damengz le, hix mbouj miz gijmaz gingqda dawz le yawj ndaej raen doxgaiq ma?

Boh naeuz, seizneix lij caengz miz.

——Vihmaz seizneix mbouj miz vunz guh cungj gingqda de ne? ——

Boh ha, caj gou majhung le, gou yaek guh cungj gingqda de, baenz lwi?

Boh mbouj guhsing nauq, gag riu ndwi.

——Mwngz mbouj saenq ha? Boh ha, gou mbouj gangjyaeuh bw, caj gou majhung le, gou haengjdingh guh cungj gingqda de.

Hawj bouxdamengz cungj dawz gij gingqda gou guh haenx;

Hawj bouxdamengz cungj lumj gou nei yawj ndaej raen doxgaiq:

Yawj ndaej raen gwnzmbwn heunaunau gyae’gyanggyang, goengq bya sangngaungau;

Yawj ndaej raen vengqfwj hausaksak mbinfiufiu, nditndat ronghsagsag;

Yawj ndaej raen duzdoengz、ndaundeiq caeuq ronghndwen gyanghaemh;

Yawj ndaej raen ndokva gyaeundei, haeuxgok ndaw doenghnaz henjrwkrwk;

Yawj ndaej raen bohmeh riunyumnyum;

Yawj ndaej raen lwg ndanggaeuq gyaeundei lai……

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）