Dahnyez byoem raezrangrang ndaemndwkndwk、 lwgda iqetet、naj lemqliq haenx dwg bouxlawz？Mbouj yungh gangj, couhdwg gou.

Gou dwg dahnyez gyaez diuqfoux ndeu. Youq gwnz daizheiq, yinhyoz yiengj hwnjdaeuj seiz, gou roxnyinh swhgeij daengx ndang hix diuq hwnj- daeuj, dungcoz riengjret, neix gou raen daengz mbouj itbuen, gou raen vuenyungz gyaeundei.

Haha, yienznaeuz gou youq gwnz daizheiq diuq yatyat, hoeng youq bingzciengz gou gig mbeisiuj, danhseih gou gamj swhgeij gag ninz lo. Miz baez ndeu, gou gag ninz, aenvih gwn raemx lai di lo, byonghhwnz deng bae veiswnghgenh. Baez hai daeng, couh yawjraen duz non gig hung ndeu, youq henz haiz gou ninz ndaek. Gou gig lau, daj mbiengj wnq roengz, veiswnghgenh hix mbouj gamj haeuj lo, couh vaiq bae heuh daxmeh. Daxmeh sikhaek byaij gvaqdaeuj, baez laeh duznon, duznon couh mbin bae lo, yienghneix gou cij gamj ninz lo.

Gou gig maij hagsib, daegbied gyaez yawj saw. Beijgangj《Gij Gyau- yuz Gyaez》《Gojgaeq Cwngzyij》……gijmaz saw gou cungj gyaez yawj. Dangyienz, gou ceiq gyaez yawj bonj saw ndeu dwg《Danghnaeuz Hawj Gou Sam Ngoenz Rongh》. Bonjsaw neix dwg gangj “gou”gvaq ndwenngoenz mbouj miz rongh, mbouj miz sing, mbouj miz vah, cingq dwg boux mengz、nuk、ngoemx yienghneix ndeu, mbeilaux mbouj lau hojnanh, cauh’ok gij geizheih siengj mbouj daengz. De couhdwg ——Haijlunz·Gaijlwz.

Miz baez ndeu, dahgux soengq bonj saw ndeu hawj gou heuhguh《Lajhaij Song Fanh Leix》. Gou angq raixcaix, couh siengj gaemz heiq ndeu yawj sat. Gou baez yawj saw couh lumz seizgan, lumz gwn haeux. Cigdaengz daxbuz heuh gou gwn haeux, gou cij rox seizgan gvaq ndaej caen vaiq, ngeuxgyaeuj “o”sing ndeu, lij sij mbouj ndaej cuengq saw roengz laeuz gwn haeux.

Neix couhdwg gou, boux gyaez yawj saw youh gyaez diuqfoux ndeu, boux haengqrengz baenaj aeu lai ndei ndeu. Mwngz nyienh caeuq gou gyau baengzyoux lwi？

（bouxlauxsae son’gyauq：Mungz Cwngzgen/蒙成建）