Hai, daihgya ndei! Gou bi neix ndaej 10 bi lo. Gou gig gyaez yawjsaw, daj gou rox saeh hwnj, moix bi ngoenzseng, gou aeu gijlaex cungj dwg bonjsaw, seizneix, ndaw rug gou coq miz haujlai bonj saw lo. Miz siujsoz dinj、sei swz gaeuq、 dungzva、 《Cib Fanh Aen Vih Gijmaz》、saw gohbuj daengj. Gou baez ndaejhoengq couh con haeuj ndaw rug bae mizfeih cubcub dwk yawj saw. Ndigah, daihgya cungj heuh gou guh “bouxmaezsaw”. Gou dwg bouxmaezsaw, hoeng mbouj dwg bouxlwngqsaw o!

Geiq ndaej sujgyaj ngoenz ndeu gyanghaet, gou cingq youq ndaw rug haeujsim lili dwk yawj saw, daxmeh cingq youq laeng ranz dak buhvaq, sawqmwh de hemqlanglang hwnjdaeuj:“Aiyo, in yaek dai lo! ”Gou sikhaek buet okbae yawj, cij raen gwnz gen daxmeh maj miz aen nwnj youh hung youh hoengz ndeu. Yienzlaiz, daxmeh deng duz dinzhenj ndat lo, in ndaej hanh lae raemxda ndik lo, de gag gangj gag naeuz:“Baez neix baenzlawz guh cij ndei ne? Haet neix nyangz deng fangz lo. Caen boihseiz ha.”Gou sawqmwh siengj daengz, youq gwnz bonjsaw gohbuj gangj gvaq, deng duzrwi duzdinz ndat le, aeu raemxgenj swiq ndaej yw in. Gou lienzmuengz beng daxmeh ma ndaw ranz dajcaemx, aeu raemxgenj bang de swiq gij sieng, gvaq yaep ndeu, daxmeh riu lo, rub gyaeuj gou naeuz:“Mbouj in lo, mwngz caen dwg daeglwg roxsoq youh coeng- mingz ndeu ha!”Gou dingq le, ndaw sim diemzsisi. Sim siengj：Caeklaiq gou bingzseiz yawj saw lai, bonjsaw hawj gou rox cihsiz iq ndaw swnghhoz, seizneix miz yungh lo, ndaej bang daxmeh cawz gij in bae lo.

Gou gyaez yawj saw, neix mboujdan hawj gou raen sim’angq, lij ndaej daezsang gij suijbingz raiz faenzcieng gou dem. Lauxsae gingciengz dawz cozvwnz gou daeuj doeg hawj daengx ban doengzhag dingq, lij gujli gou yungh Sawcuengh sij, ndaej fat haujlai bien hwnj bauqceij gvaq lo, daihgya haenh gou guh “bouxcozgyah iq”ne!

Bonjsaw dwg mbaeklae hawj vunz doxhwnj. Cihsiz ndaej gaijbienq aen mingh. Gou aeu yawj saw baenz ciuh, ciengxlwenx guh “bouxmaezsaw” ndeu.

（bouxlauxsae son’gyauq：Cuh Veimingz/朱卫明）